08 Nov 2019 10:50

inkhel

​FC Venghnuai leh Ramhlun North FC chak zawk an awm lo

Mizoram Premier League (MPL) Season 8 khelh mekah November ni 8, Zirtawpni tlai round 11 match hmasa ber Ramhlun North FC leh FC Venghnuai inkhelah chak zawk awmlo in 3-3 in an inhneh tawk. He inkhelah hian FC Venghnuai defender Lalruatfela chu Man of the match-ah thlan a ni.

Team pahnihte hi round 3-ah in tawngtawhin FC Venghnuai hian 1-0 in anhneh tawh a, an intawn vawihnihnaah erawh chak zawk awmlo in an inhnehtawk. FC Venghnuai hian point 11 neitawhin parukna annih chhunzawm a, Ramhlun North FC hian point 8 neiin parukna an nih chhunzawm bawk.

Ramhlun North FC 3-3 FC Venghnuai

(Lalpekhlua Jongte 8', 14', Lalremsanga 24') (Vanlalthanga 24', (P) 28', Lalruatfela 48')

MoM: Lalruatfela, FC Venghnuai

First half-ah goal nga zet aluta, Ramhlun North chuan nawr nghalin minute 8 chhungin goal hnih an khung hman. goal hmasa ber hi midfielder Lalpekhlua chuan FC Venghnuai defender te a bum hnuah chiang zetin a chhuih lut a, freekick atangin Lalpekhlua bawk chuan an goal hnihna akhung leh bawk.

FC Venghnuai pawhin nawr letin minute 24-ah penalty an hlawhchuak hlauh. He penalty hi forward Vanlalthanga chuan goal-ah chantirin an siphurh a sut then. Minute 1 aral hman lo.  Ramhlun North defender Nunzira ball pek tha zet chu box chhunga awm midfielder Lalremsanga chuan goal-ah chantirin an goal thumna a khung zui leh nghal zat a, 3-1 in Ramhlun North chuan hma an hruai zui ta a ni.

FC Venghnuai pawhin an siphurh sut ngei tumin an nawr let a, minute 28-ah Vanlalthanga bawk chuan an goal hnihna khung mahse Ramhlun North chuan 3-2 a hmahruaiin chawlhlawk an hmang zui ta a ni.

Second half tan a ni a, minute 3 aral hmain FC Venghnuai chuan ansiphurh an sut nghal. An siphurh ansutna goal hi Vanlalthanga ball vawrh luh chu box chhunga awm defender Lalruatfela chuan mawitakin a bin lut.

Team pahnih te an innawr tawn leh zak zak hnuah FC Venghnuai chuan goal thun belhna hun tha neiin midfielder Lalhruaitluanga chuan Ramhlun North keeper Eddie-a chiah a hmachhawn hnuah goal kham chuangah chiah apet.

Ramhlun North pawhin huntawp dawnah goal thunna hun tha neiin forward Jessy-a ball vawrh luh chu bench atanga lut Ramhlunchhunga chuan a hmang tangkai thei bik lo a, chak zawk awmlo in 3-3 a inhneh tawkin khelmual an chhuah san ta a ni.

November ni 14, Ningani zan dar 7:00-ah Ramhlun North FC hian Electric Veng FC an hmachhawn ang a, November ni 15, Zirtawpni zan dar 7:00-ah FC Venghnuai hian Aizawl FC hian an hmachhawn ang.