04 Mar 2016 07:51

inkhel

Fans nei tha Mission Veng Vikings an chak.

Lalthanhawla Indoor Stadium, Pitar te tlang a Mizoram Super League khelh mekah zanin khan Mission veng Vikings chuan season hmasa finalist Zarkawt BCA 84-76 in an hneh. Vikings tan Shooting Guard Lalrina Renthlei leh captain Moses-a te an chakna kawngah an thawh hlawk tak zet a, an pahnih hian points 52 zet an score thei a ni.

First quarter tan a ni a, BCA lamin basket nei hmasa zawkin BCA forward Jackson chuan he inkhela point hmasa a score a. Lalrina-a'n inkhel bul a tan loh a lang a, Vikings game in awmzia a nei thei meuh lo a ni. BCA Shooting Guard Zorina Tochhawng a dawng hle a, first quarter-ah 3 points vawi 4 zet a nei hman a ni. First quarter-ah BCA lam hian 22-13 in hma an hruai.

Second quarter-ah Lalrina'n inkhel a tan a, Viking game in hma a sawn hle. Moses-a leh Lalrina BCA lamin an dang thei meuh lo a tih theih awm e. Second quarter-ah Lalrina'n points 9 neiin Viking hma a hruai pui. BCA tan Centre palian Matthew-a naupanna a lang a, tharum a hmang ngam lo deuh niin a lang. Vikings lam hian 39-36 in second quater-ah BCA an lehthal a ni.

Third quarter-ah inkhel hmuhnawm team pahnih in min entir zui a, an in leh pel tawn zak zak a ni. BCA Shooting Guard Henry-a'n 3 points luhin BCA lam rawn phur hman viau mahse Lalrina bawk a langsar leh a, third quarter a points score hnem ber niin point 8 a score thei a ni. BCA game in beisei a pha lo a, season hmasa finalist leh Marova Memorial Basketball Tournament a champion lai hian shooter tha an neih loh an tuar a tih theih awm e. Third quarter zawhah pawh Viking lamin 57-54 in hma an hruai chhunzawm zel a ni.

Fourth quarter-ah chak zawk tur hriat loh khawpin team pahnih te an in um tawn zak zak a. Fourth quarter-ah Matthew-a'n point 8 score in BCA chak pui tum viau mahse Vikings tan Lalrina leh Moses-a'n point 21 zet an score avangin Vikings an tang tluan thei a ni. Hun tawp dawn hnaih inkhel boruak sang nen Viking player Lalrina leh BCA player Dave-a te han in nem tawn nawk nawk mahse inkhel ti tawp lo in an zo thei hram a ni.

Inkhel pumpui thlirin team pahnih te khel tha ve ve mahse fans nei tha zawk Vikings lamin chak an phu zawk tih theih a ni. BCA lamin au phur tu an neih loh an tuar tih theih a ni a, fans thutna a hnaih avangin fans-ten inkhel boruak an thlak danglam thei hle. BCA tan Matthew-a a che tha ber tih theih a ni a, points 19 score in rebounds 14 zet a la a, Block vawi 5 a nei bawk. Zorinsanga quarter tir lamah rawn khel tha viau mahse inkhel a rei a, a zuih ral tih theih a ni. Points 19 score in, steals 5 nei mahse a team in an mamawh lai ber fourth quarter-ah point khat mah a score lo a ni. Matthew-a leh Zorinsanga te naupanna a lang tih theih a ni a, game boruak sang an la zo tawk lo a tih theih bawk.

Vikings lam tan Lalrina Renthlei a pawimawh tluk zetin Season 1 Most Defensive player Moses a pawimawh tel bawk. Moses hian a team in an mamawh hunah points a score thei em em a. Centre ni chungin 3 points vawi 5 zet a luh a, steals vawi 5 a neih bakah rebounds vawi 7 a la bawk. Lalrina hi mizo player-ah chuan a tha ber a nih loh pawhin a aia tha an tam kher lo ang. Vikings guard hian dribbling duhthusam a nei tih theih a ni a, 3 points a score theih bakah a zuang sang hle. Vikings chakna thahrui pawimawh ber tih ngam a ni a, points 27 zet a score bakah assist 5, Blocks 4, Rebounds 8 zet a nei thei a ni.