08 Dec 2018 01:48

inkhel

Fan Favourite Award dawngtu Simona Halep

Simona Halep chu Women’s Tennis Association (WTA) chuan Fan Favourite Award an hlan a, he chawimawina hi a zawnin vawi hnih chu a dawng ta a ni.

World No. 1 Simona Halep chuan tennis ngainatute ngaihdan an lak atanga chawimawina an pek chu lawmawm a tih thu a sawi a. Hetiang taka miin an lo ngaisang der chu ropui a tih thu a sawi a ni.

Kum 27-a upa Simona Halep chuan WTA ranking-ah ro a rel chho zel a, Australian Open final a lut a, Roland Garros-ah a champion a, Grand Slam title chu a vawi khatna atan a la ve a. Roger Cup leh Shenzhen Open-ah te pawh a champion bawk a ni.

Romanian star Halep chuan, “Thil lawmawm deuh mai chu min ngaisangtute hi ka inkhelhna apiangah an rawn kal ve zel mai a. Ka rin ai hian min tantu hi an lo tam phian zel a, hei hian ka lawmna a tizual thin a. Ri nuaih nuaih kara ka hming an han lam ri te hi a ngaihnawm bik lehzual a, kalna apianga tantu neih chu a hluin a lawmawm dan a dang em em mai a ni,” a ti.

Women’s Tennis Association in Fan Favourite Award hi kum 10 chu an hlan ve ta a, hemi kum 10 chhung hian Simona Halep bakah hian hmeichhe dang pali chauhin he chawimawina hi an la dawng a ni.

Russian star pahnih Maria Sharapova leh Elena Dementieva te chuan chawimawina hi vawi khat ve ve an lo dawng tawh a, tun hnai lawka tennis khelh chawlhsantu, Polish star Agnieszka Radwanska chuan 2011 leh 2016 inkar khan a zawnin vawi 6 ngawt mai a lo dawng tawh a ni.