Monaco midfielder Arsenal, Barcelona leh Chelsea tan te pawha lo khel kual tawh Cesc Fabregas chuan a manager hrawn tawh zawng zawng zinga tha a tih ber pahnih a sawia, mi tam takin a sawi ngei tura an rin a sawi tel lo.

Fabregas hi Barcelona academy chhuak ni mahse naupang te a nihin Arsenal chuan an la a, Arsenal-ah hian kum 2003 atanga kum 2011 thleng awmin, manager pakhat a hrawna, French pa Arsene Wenger a ni.

Kum 2011 khan Arsenal chhuahsanin Barcelona a pana, Barca-ah hian kum 2014 thleng awmin, hetah hian khawvela manager tha bera mi tam takin an ngaih Pep Guardiola nen inhrawn lehin, kum 2014 khan manager huhang ngah em em Jose Mourinho chuan Chelsea-ah a la lut.

Chelsea-ah hian Mourinho bakah Italian manager Antonio Conte a hrawn leha, Spain tan hian Vicente del Bosque hnuaiah khel rengin, Del Bosque-a ho hian World Cup nomawi pakhat leh Euro pahnih an la nghe nghe a, mahse Fabregas hian Del Bosque hi a thlan tel lo.

Fabregas chuan Arsenal-a a mah siam lian tu Wenger leh Premier League title a lo lak pui tawh Jose Mourinho –te chu a manager hrawn tawha tha a tih ber te an nih thu a sawi.

Fabregas chuan, “Khawvela manager tha ber ber te ka lo hrawn tawha, vuina tur eng mah ka nei lo. Mahse sawi ngei ngei a ngai a nih chuan ka manager hrawn tawha tha ber te chu Wenger leh Mourinho-te an ni a tih theih awm e,” a ti.