FA Cup: Semi-final ah Chelsea an lut

17th March 2024, 08:03PM

Chelsea chuan Sunday tlai khan FA Cup quarter final inkhelah Championship club Leicester City an mikhual a, Chelsea hi 4-2 a chakin, semi final khel turin an inpet tling.

Stamford Bridge-ah hian Chelsea tan Marc Cucurella, Cole Palmer, Carney Chukwuemeka leh Noni Madueke te chuan goal khat theuh an khung a, Leicester tan Stephy Mavididi chuan goal khat khungin, Chelsea defender Axel Disasi a own-goal bawk.

Chelsea hian minute 10 chuang hret an khelhin an goal hmasa ber an khung a, Nicolas Jackson chuan dinglam atanga Leicester box-a ball a khalh luh hnuah cross in, Cucurella chuan awlsam takin far post-ah goal a lo khung.

Darkar chanve an khelh tlin hma deuhin Chelsea in penalty an hlawhchhuak a, Raheem Sterling chuan penalty spot atangin Chelsea goal hnihna tur khungna hun tha tak nei mah se a hlah a, a penalty hi Leicester goalkeeper Stolarczyk chuan a lo save.

Chelsea hian half time hma lawkin an goal hnihna an khung a, Sterling chuan veilam atangin Foxes box ah ball a lalut a, a ball cross chu Cole Palmer-a’n goal-ah chan tirin, 2-0 in first half a tawp.

Second half-a minute 5 chuang hret an khelhin Leicester goal hmasa zawk a lut a, Disasi chuan yard 35 vel laia hla atangin an lamah goal a khung palh a, 2-1 a ni. Darkar khat chuang hret an khelhin Leicester in an si phurh an rul zo a, Mavididi chuan veilam atanga Chelsea box-a ball a khalh luh hnuah Malo Gusto bumin goal-ah mawi takin ball a chhuih lut.

Leicester hian an si phurh pahnih rul mah se, 73mins-ah first half-a penalty chawitu Callum Doyle chuan Jackson a titlu a, Doyle hi a vawi hnih nana yellow card pek niin hnawhchhuah a ni. Chelsea hian injury time-ah goal hnih an khung a, Chukwuemeka-a’n goal a khung hnuah Madueke chuan minute 4 hnuah goal a khung ve leh a, 4-2 in Chelsea hi an chak ta a ni.

Copyright © inkhel.com 2025. All rights reserved.