FA Cup third round inkhelah Inrinni zan lai khan Liverpool chuan Wolves an mikhual a, chak zawk awm lovin team hnihte hi 2-2 in an inhnehtawk.

Anfield-ah hian Liverpool tan Darwin Nunez leh Mohamed Salah te chuan goal an khunga, mikhual lam tan hian Goncalo Guedes leh Hwang Hee-chan te chuan goal an khung bawk.

He inkhelah hian chak zawk an awm loh avangin, Liverpool leh Wolves te hi an intum nawn dawn a, mahse Wolves home Molineux Stadium-ah a ni thung tawh dawn a ni.

Liverpool tan an player thar Cody Gakpo chuan Wolves lakah hian Reds tana a game hmasa ber a khela, Dutch forward hi a khel chhe lova, a tirah chance nei nghal mah se, a low shot chu Wolves goalkeeper Matija Sarkic-a'n a save sak.

Wolves an khel tha a, darkar chanve an khelh tlin hma deuhin hma an hruai a, Liverpool goalkeeper Alisson Becker chuan Wolves forward Guedes ball pe palhin, Guedes hian goal-ah a khung chhunzawm. Half time hma lawkin Liverpool in an si phurh an rula, Trent Alexander-Arnold a ball vawrh tha tak chu Nunez chuan box chhung atangin goal-ah a pet luta, 1-1 in first half tihtawp a ni.

Second half tir lamah Liverpool in hma an hruai ve thunga, Wolves box lamah Gakpo chuan ball vawrhin, Toti chuan lo tauh chhuah tum mah se an box lamah ball a tauh leta, Salah chuan hei hi hmang tangkaiin Liverpool goal hnihna a thun a, 2-1 in Liverpool in hma an hruai.

Liverpool in hma an hruai hnu lawkah Wolves hian chance tha tak an nei ve leh nghala, mahse Ait-Nouri a shot chu Alisson-a'n a save. 66mins-ah Wolves in an si phurh an rul ve leh a, Hee-chan chuan Liverpool box chhungah ball khalh lutin, a veilama awm Cunha ball a pe. Cunha hian Hee-chan hi a pe ve leh nghala, Hee-chan hian ball lo tlawhin, goal-ah a luta 2-2 a ni.

Minute sawmriat chuang hret an khelhin, Toti chuan Wolves chakna goal tur a khung emaw a ti zeta, mahse VAR-a endik a nih hnuah, build-up a offside avangin goal hi pawm a ni lova, 2-2 hian inkhel a tawp ta a ni.