31 Jul 2020 04:31

inkhel

FA Cup trophy lak ngei kan tum dawn: Arteta

Mikel Arteta chuan FA Cup final-a Arsenal leh Chelsea inkhelh hunah trophy la ngei thei turin an tha neih zawng zawng an sawm khawm dawn tih a sawi.

Arsenal chuan FA Cup semi final-ah Manchester City an hneh a, final an lut a. Semi final lehlamah Manchester United chu Chelsea in an hneh a, final hi an lut ve bawk a ni.

Arteta chuan, “Thil tum pakhat chiah kan nei dawn a, kan rilru pekna tur leh kan tha zawng zawng kan hmanna tur chu thil pakhat chiah a ni. FA Cup trophy hi lak ngei kan tum dawn a, chutiang tur chuan theihtawp kan chhuah dawn,” a ti.

“FA Cup final-ah hian club lian pahnih kan inkhel dawn a. Tun dinhmunah Chelsea hi an tha viau mai a, tun season chhungin zinkawng hautak zet mai an zawh chho a, tun dinhmun hi an thleng thei a ni a. Kan kawng a awlsam dawn lo tih a chiang a, champion ngei chu kan tum ang,” a ti bawk.

Gunners boss hian Chelsea manager Frank Lampard a fak hle a, chutih rualin Liverpool manager Jurgen Klopp leh Manchester City manager Pep Guardiola te nen an khaikhin thin chu a dik chiah rih lo deuha a hriat thu a sawi bawk.

“Frank Lampard hi player ang khan a tha thei em em a, a chungnung berte zinga tel tlak a ni thin a. Kum tam tak chhung kha tlahniam em em loin a khel thei a, club lianah position inchuh nasat em emah a khel mar pat thei a ni,” a ti.

“Manager a nih hnuah a tumruhna te a lang chiang em em mai a, a team te a fuih dan atang hian manager chhe tak a ni lo tih a chiang a. Tun season chhung pawhin a che chhe lo hle a, a fakawm ka ti hle a. Kan pahnihin kan kum a la tam em em lo ve ve a, zinkawng kan la zawh thui lo ve ve bawk a, hei vang hian Klopp leh Guardiola te nen huang khata dah chi kan la ni lo,” tiin Mikel Arteta chuan a sawi a ni.