01 Aug 2020 10:49

bakteaJr.

Mizo tlangval

​FA Cup final thlir lawkna

Zanin dar 10-ah hian FA Cup final khelh a ni dawna, London club pahnih intum dawnin, UK-a stadium lian ber Wembley Stadium-ah North London club Arsenal leh West London club Chelsea te chuan FA Cup title an inchuh dawn.

FA Cup hi football tournament upa ber a ni a, hei hi a ti hlu tu pakhat niin, zanin final hi FA Cup final 139-na a ni. Inkhel hi Sony TEN2-ah India-ah chuan a en theih ang.

Final-ah hian FA Cup-a champion ngun ber, vawi 13 champion tawh Arsenal kan hmu dawna, vawi 14 nana champion tum mekin, FA Cup chanchina club hlawhtling ber an ni.

Kum 2001 atanga chhiarin FA Cup-ah Arsenal leh Chelsea aia champion ngun an awm lova, kum 2001 atang khan team hnihte champion tawh zat belhkhawm hi 11 a ni.

Arsenal tan he inkhel hi a pawimawh zual hle a, a chhan chu kum 25 chhunga an season chhe ber hmangin, season tharah Champions League chu sawi loh Europa League khel tur pawhin an inpet tling zo lova, FA Cup-ah hian an champion a nih chuan Europa League an khel thei hlauh dawn.

Chelsea hi palina niin season an khar avangin season tharah Champions League an khel dawna, mahse an tan FA Cup-a hming chherna hun tha niin, an huntha bawhpelh an duh hauh bik lovang.

Chelsea hian final lut turin semi-final ah Manchester United an hneha, Arsenal hian final lut tur hian semi-final ah Manchester khaw club dang Manchester City an hneh ve thung.

Arsenal tan hian Shkodran Mustafi, Gabriel Martinelli, Callum Chambers, Pablo Mari leh goalkeeper Bernd Leno te chuan inhliam avangin final hi an khel thei dawn lova, Chelsea tan Billy Gilmour chiah khel thei lo tur chiang awmin, N’Golo Kante a khel thei dawn em a hriat loh.

Chelsea manager Frank Lampard chuan khawvela goalkeeper manto ber Kepa Arrizabalaga chu bench lama a dah leh a rinawma, Kepa aiah an game hnuhnung bera si ban nghak tu kum 38 mi Willy Caballero chu hman a nih leh a rinawm.

Line-up prediction:

Arsenal- Martinez; Holding, Luiz, Tierney; Bellerin, Ceballos, Xhaka, Saka; Pepe, Lacazette, Aubameyang

Chelsea- Caballero; Azpilicueta, Rudiger, Zouma, Alonso; Jorginho, Kovacic, Mount; Hudson-Odoi, Pulisic, Giroud