Stamford Bridge-ah Chelsea chuan si hnih faiin Scunthorpe an hneh a, Blues chuan FA Cup Fourth Round an lut, Chelsea tan Diego Costa leh Loftus-Cheek ten goal an khung a ni.
Premier League champion lai Chelsea hian an title an humhim theih an inring tawh lo. Champions League kan khelh phak mialin tiin league-ah theih tawp an chhuah mek. Hetih lai hian FA Cup-ah erawh Champion theihna chance tha tak an neih avangin Guus Hiddink chuan a tha thei ang berin team a set a, League One side Scunthorpe United chu si hnih faiin an hneh ta a ni.
Chelsea 2-0 League One side Scunthorpe United
Diego Costa 13′ Loftus-Cheek 68′
Chelsea : Begovic, Ivanovic, Zouma, Cahill, Azpilicueta, Fàbregas, Ramires, Willian, Oscar (Loftus-Cheek - 45' ), Pedro (Kenedy - 72' ), Diego Costa (Traore - 86' )
Scunthorpe United : Daniels, Clarke, Mirfin, Wallace, Laird, Madden, Dawson (King - 79' ), Ness, Bishop, van Veen (Wootton - 81' ), Williams (Adelakun - 79' )
Ball possession en hi chuan Chelsea hian harsatna an tawk em em lo niin a lang, 69% lai ball an chang a. Shots vawi 8 atangin vawi 4 chu goal zawnah a kal a ni. Hetih lai hian Scunthorpe hi an tang hle a, an khingpuite hi player tha tak tak ni mahse a kaw tawpah an tang. Penalty hlawhchhuah theihna chance pawh an nei bawk a ni.
Chelsea goal hmasa zawk hi 13 mins-a lut a ni a, mual dinglam sir atanga Ivanovic cross chu box chhunga lo awm Diego Costa chuan a ke veilamin a lo pet lut a, a mawi hle nghe nghe a ni. Chelsea goal hnihna hi bench atanga lut Loftus-Cheek khung a ni a, second half 68 mins-ah mual veilam sir atangin Cesar Azpilicueta chuan tha zetin lei hrulah a cross, Ruben Loftus-Cheek hian cool zetin chu chu a lo chhuih lut ta a ni.
Scunthorpe hian penalty hlawhchhuah an inbeisei ve hle a, box chhungah Ramires chuan van Veen a titlu, referee Craig Pawson chuan penalty-ah a ngai lo. Scunthorpe United boss Mark Robins a lawm lo hle nghe nghe a ni. Man of the match-ah hian Azpilicueta nge Diego Costa thlan zawk tur hriat thiam har khawpin an khel tha ve ve a, Cesar Azpilicueta hi inkhelh chhung zawnga Chelsea attacking tinatu a ni a, tackle vawi engemaw zat a neih bakah pass vawi 64 lai a nei nghe nghe. Diego Costa a rawn che tha chho leh hle a, a game hnuhnung pathumah goal a khung vek a ni.
Ruben Loftus-Cheek hian Chelsea senior team-ah a vawi khat nan goal a khung a, shot on target a vawi khat neih naah a goal nghal nghe nghe a ni. Diego Costa chuan Chelsea tan tun season competition hrang hrangah goal 8 a khung tling leh ta der mai. A game hnuhnung pathumah goal li a khung a, Premier League-ah goal 6 a khung tling ve ta bawk a ni.
pictures credit : Reuters