FA Cup 5th round inkhelah Chelsea chuan Stamford Bridge-ah Manchester United an lo mikhual dawn a, zanin zanlai/naktuk zing dar khatah an inkhel ang.
Chelsea hian an Premier League game hnuhnung berah Manchester City an tlawha, 6-0 laiin an tlawm a, kar liamta khan Europa League-ah Malmo chu 2-1 in an hneh. United hi interim manager Ole Gunnar Solskjaer-a che tha hle mahse kar liamta khan Champions League-ah PSG an hneh lo hle a, si hnih faiin Old Trafford-ah an tlawmin, a vawikhat nan Solskjaer-a hnuaiah an tlawm.
Chelsea manager Maurizio Sarri chuan tun hnaiah London club hi a chet that pui lem lo hle a, tun hnai lawk khan Bournemouth lakah si li faiin an tlawm tawh bawk. Sarri-a dinhmun hi a derthawng tan hle niin a ngaih theiha, Sarri-a tan chuan United lakah hian chak ngei ngei a ngai.
PSG an hmachhawn hma zawngin United chu che tha hle mahse PSG lakah an that tawk loh zia a langa, Solskjaer-a hnuaiah an chak pur pur ang hian an kal reng thei dawn lo tih an inhriatchhuah phah pawh a tih theih awm e.
Chelsea tan hian inhliam avangin Ruben Loftus-Cheek a khel thei dawn lova, Loftus-Cheek bak hi Blues hian inhliam an nei thar lo. Europa League inkhelah Sarri chuan an left back rim tak Marcos Alonso chu a chawlh hahdam tira, United lakah Spaniard left back hi a inlan leh tawh ngei a beiseiawm.
Chelsea provisional squad: Kepa, Caballero, Azpilicueta, Zappacosta, Emerson, Alonso, Christensen, Luiz, Rudiger, Ampadu, Jorginho, Kante, Barkley, Loftus-Cheek, Kovacic, Hudson-Odoi, Willian, Hazard, Pedro, Higuain, Giroud.
United hian kar liamta khan player inhliam pahnih an nei thara, Solksjaer-a hnuaia player pawimawh pahnih Anthony Martial leh Jesse Lingard-te chu kar thum tal an chawlh a ngaih dawn avangin Chelsea an hmachhawn thei dawn lova, United hian an tuar lovang tih a sawi theih loh. Martial leh Lingard bakah hian captain Antonio Valencia le Matteo Darmian-te chuan Chelsea hi an hmachhawn thei dawn lo bawk a ni.
Man United provisional squad: De Gea, Romero, Grant, Dalot, Shaw, Young, Jones, Bailly, Smalling, Lindelof, Fred, Matic, Herrera, McTominay, Pereira, Pogba, Mata, Sanchez, Lukaku, Rashford, Chong, Gomes.
Chelsea leh United-te hi vawi 181 an inhmachhawn tawha, United hi vawi 84 chakin Chelsea hi vawi 54 an chak tawh thunga, an inhmachhawn hnuhnung 17-ah erawh Chelsea hi vawi hnih bak an tlawm lo thung a ni.