25 Oct 2019 05:30

inkhel

F1 vangin Top Gun: Maverick ka hnawl: Hamilton

Lewis Hamilton chu Formula 1 vangin a buai hle a, hei vang hian tun hnaia film an siam Top Gun: Maverick ah pawh a tel loh phah niin a sawi.

Formula 1 driver Lewis Hamilton hi a hma pawhin film lar takah a lo inlan ve tawh a, a inhnamhnawih tawhna te chu Cars leh Zoolander 2 ah te khan niin, 1986 a film lar em em Top Gun chhunzawmna Top Gun: Maverick ah hian a chang ve ta lo a ni.
Kum 34-a upa Lewis Hamilton chuan nakin zelah lemchan khawvelah inhman chhoh ve a duh thu sawiin, tunah pawh hian Hollywood agent a ruai der tawh niin a sawi a ni.

Hamilton chuan, “Top Gun film kha ka ngaisang hle a, kha vang khan Top Gun: Maverick ah pawh hian tel ve theih ka tum hle a. Amaherawhchu, Formula 1 thil velah ka buai em avangin ka tel ve hman ta lo a. Tel theihna hun tha ka nei a, ka ti thei ta lo thung a ni,” a ti.

“Film-a chan ve hi ka duh a, a hma deuh pawhin film pakhata chang ve turin dilna ka thehlut a. Ka chanpual tur chu ni khat chhung chauhin ka thiam hman a. Paris khawpuiah fashion show-ah ka tel ve a, vawi 5 vel inlan ka la ngai a, a kar lakah acting coach ka hmu a, minute 20 chhung lekin chanvo pakhat chu ka thiam hman a. Fashion show zawhah a dang ka thiam belh leh bawk a ni,” a ti bawk.

A sawi zelnaah, “Tlai lamah chuan ka thil zirte chu video hmangin an la a, Los Angeles lama thawn turin an ti a, a nuam dangdai ve riau a. Khami tumah khan kha chanvo kha ka hmu thei ta lo a, Kurt Russel te ang chi kha an pe ta a. Kurt Russell chu a ni chiah lo a, a thawhpui hnaivai tak erawh a ni tih an sawi,” a ti.

Formula 1 season-ah intlansiak vawi 21 a awm a, 2020 atang chuan intlansiak vawi 22 a awm tawh dawn a. Lewis Hamilton chuan season khat chhungin intlansiak tam tak a awm avangin film chan chu a tan tih ngaihna a awm loh thu a sawi a, intlansiak a chawlhsan hma chuan film a chan theih a beisei loh thu a sawi.

Hamilton chuan, “Tun dinhmunah chuan film chang tur hian hun ka nei lo khawp mai a. Thlasik laiin film chan theihna hun chu a awm maithei a, mahse chawlh hahdamna hun ka nei dawn lo tihna a ni ang a, a buaithlak dawn tlat a ni,” a ti.

“Ka hun neih dan hi a khat tha thei khawp mai a, hun awl hi a awm hman meuh lo a ni ber a. Season a tawp meuh hi chuan a thawventhlak ve huai thin a, hetiang hun awl neih ve tawh hi chuan mahni nuam tih zawng leh tih chak zawng hi ka dap kual nasa ve thei hle,” a ti bawk.

A sawi zelnaah, “Lemchan lamah hian ka tha dawn nge dawn lo chu ka hre hauh lo a, ka lut ve thei dawn nge dawn lo tih pawh hriat a la ni lo bawk a. Heti chung hian luh theih hi ka tum ve chhin hrim hrim dawn a ni,” a ti.