F1 US Grand Prix-ah Bruno Mars leh Britney Spears

27th April 2018, 12:04AM

Formula 1 intlansiak pakhat, US Grand Prix neih hunah Britney Spears leh Bruno Mars te an inlan ve dawn.

US Grand Prix huaihawttute chuan kumina Austin, Texas a Formula 1 intlansiak neihnaah Britney Spears leh Bruno Mars te an tel dawn thu sawiin, mipui tam zawk an hip theih nan intlansiak hma hian concert an nei dawn niin an sawi.

Nikum khan Circuit of the Americas-a US Grand Prix neih dawnin a buatsaihtute chuan Justin Timberlake an lo sawm tawh bawk a, a hma kum aiin entu pawh an thahnem zawk daih a, intlansiakah Lewis Hamilton a chak ber a nih kha.

Kumin October 21 (Pathianni) khian US Grand Prix hi an tlan dawn a, intlansiak hma Inrinni zanah Bruno Mars concert en tur a awm ang a, an intlansiak ni takah Britney Spears chuan mipui a awi ve thung ang.

Formula One hi American ho zingah a tla na lutuk lo niin a lang a, hei vang hian a buatsaihtu lampang chuan mipui tam zawk hip dan hi an ngaihtuah a. 2016 pawh khan Taylor Swift chu an lo ruai tawh a, kawngro chu a su ve hle niin an sawi.

2012 atangin US Grand Prix hi neih tan a ni a, a entu hi an tlahniam sawt hle a, an tih tan kum hian mipui 2,65,499 te chu ni thum chhung an awm a. 2015 khan 2,24,011 ah entu hi an tlahniam a, 2016 khan Taylor Swift zarah 2,69,889 ah an chho leh a. Nikumah Justin Timberlake chuan a tlahniam tur a chhan nasa thei vak lo a, mi 2,58,000 an awm a ni.

Nikum khan Justin Timberlake zai en turin mipui 38,916 vel an kal a, mahse heng mipui tam zawkte hi qualifying neih zawh hnuah an kalkhawm chauh a. A lan dan atangin intlansiak lampang ai chuan rimawi chuan a pawt khawm ngei niin a ngaih theih.

Copyright © inkhel.com 2024. All rights reserved.