24 May 2019 07:26

inkhel

F1 Monaco Grand Prix lam hawi ang

Tun karah Formula One intlansiak a awm leh dawn a, Pathianni hian Monaco Grand Prix a awm dawn a. Monte Carlo khawpuia Circuit de Monaco ah khawvela car tlan chak ho chu an intlansiak leh ang.

2019 season atan chuan Monaco Grand Prix hi vawi ruk an intlansiakna tur a ni dawn a, Nilaithawhtan khan practice an nei tawh a, Inrinni hian qualifying an tlan ang a, Pathianni (May 26) hian an intlansiak dawn a ni.

Nikumah khan
Red Bull Racing driver, Australian mi Daniel Ricciardo chuan 2016 kuma a chet fuh loh kha dahthain, Red Bull tana a chak hmasak ber hmel a hmu a, Monaco GP-ah pakhatna a ni a. 2016 ah pawh khan pakhatna ni thei tura ngaih a ni a, mahse pit stop-ah an chet fuh loh avangin pakhatna a nih loh phah a ni.

Nikumah pawh a kawng a awlsam chuang lo hle a, a car khawl (MGU-K) chu a chian loh avangin duh angin a tlan chak thei lo a. A car chakna chu 25% vel ngawtin a tlahniam a, heti chung hian a car duhthusam tawh lo chu a theihna zawng zawng sawm khawmin a khalh tluanchhuak a, an intlansiakna hmun chu inlehpelh a harsa tel bawk a, a vannei thei ta hlauh a. Hmun danga intlansiak niin, Monaco-a a thil tawn ang hi tawng ta se, pakhatna nih chu sawi loh, a tawp thleng pawhin a tlan a rinawm lo hle.

Circuit de Monaco
An intlansiakna hmun tur Circuit de Monaco hi han bih chiang thuak ila:

Circuit length: 3.337 km
First grand prix: 1929 (Championship GP hmasa ber chu 1950)
Laps: 78
Race distance: 260.286 km
Race lap record: 1.14.260 - Max Verstappen, 2018
2018 winner: Daniel Ricciardo, Red Bull
Number of corners: 19

He circuit-ah hian inlehpelhna hmun remchang a tam lo hle a, in hnuai atanga an tlan chhuah hnu chicane vel bawr kha inlehpelhna atan chuan a fuh deuh ber pawl nia ngaih a ni.

Tun season-ah Mercedes an che tha fal hle a, vawi nga intlansiak tawhah a hma pahnihah hmun an chang ngar ngar a. Monaco-ah pawh hian boruak nei tha leh viau tura ngaih an ni a, chutih rual chuan eng thil pawh thleng thei a ni a, team dangte chu a dingchangah an tang ve thei bawk a ni.