British Formula One racing driver hlui Sir Stirling Moss chu vawiin April thla ni 12 hian London-ah kum 90 mi niin a boral.

Moss hi hun rei tak a dam lo tawha, Kum 2018 January thla atang khan pawn pawh chhuak mumal tawh lovin a awma, thlamuang takin a chawl ta niin a nupui Lady Moss chuan a sawi.

Holiday hmangin Moss hi kum 2016 khan Singapore-ah a zina, a awm lamah harsatna nei zuiin ni 134 chhung damdawiin lamah a lo awm tawh bawk.

Moss hian F1 World Championship vawi khat mah la lo mahse F1 driver awm tawh zinga ropui ber pakhata ngaih a ni a, F1 driver world champion ni lo zinga ropui ber tih hial pawhin an lo sawi thin.

Competition leh category hrang hrangah Moss hi race 529-ah a career chhungin a tlan hmana, heng zingah hian race 212 ah hnehna a chang thei.

Kum 1955 leh kum 1961 chhung khan Moss hi F1 World Championship-ah vawi li pahnihna niin, vawi thum pathumna a ni bawka, kum 1990 khan International Motorsports Hall of Fame-ah a hming dah luh a ni nghe nghe.

Moss hi Mercedes driver hlui a ni a, a thih thlengin Mercedes lam nen pawh inkhungkaih tha in Mercedes-Benz Brand Ambassador te pawh a lo ni tawh a ni.