May ni 21 khan Formula One driver awm tawh zawng zawnga ropui ber zinga mi Niki Lauda chu kum 70 mi niin a boral.

F1 driver hlui Lauda hian thla riat kalta mai khan a chuap a thlaka (lung transplant) tunah damlohna avangin Austria khawpui Vienna-ah a boral zui ta a ni.

Kum 1975 atanga kum 1984 chhung khan Lauda hi vawi thum ngawt Formula One champion a ni a, kum 1975 leh kum 1977 khan Ferrari driver niin World Championship a la a, kum 1984 khan McLaren driver niin World Championship la lehin, F1 chanchinah Ferrari leh McLaren tana World Championship la ve ve thei awmchhun a ni.

Kum 1976 khan Lauda hian vanduaina nasa tak a tawk a,German Grand Prix an tlan tumin lap hnihnaah a accident a, hliam na tak tuarin a beng dinglam zawng zawng deuh thaw a kang rala, a lu a kang nasa em em a, a mithmul te a chan mai bakah a mithrui / mittlangkawm a kang ral titih bawk. A chetsual hnu hian Lauda hian a lu ah ser a neih nasat em avangin lukhum a khum deuh reng tawh.

Lauda hi kum 1979 khan a retire-a, kum 1982 khan rawn kirin hemi tumah erawh Ferrari-ah ni lovin McLaren lamah a kal a, kum 1984 khan world champion a ni zui leh ta bawk a ni.

Ferrari driver a nih laiin Lauda hi McLaren driver James Hunt nen an inel thin hle a, a bikin kum 1976 kha an inbeih vanglai tak niin, an pahnih movie hi siam a ni nghe nghe a, kum 2013-a tihchhuah ‘Rush’ tih movie kha niin, Lauda hi a tawpah he film-ah hian a lang ve zuai bawk.