Kimi Raikkonen chu Ferrari atangin a thlawn teuh tawh hle a, a aiawh tur hian Charles Leclerc chu an be tawh niin sawi a awm tawh hial a. Raikkonen hian Formula 1 khawvel a chawlhsan a nih chuan Lewis Hamilton chuan Kimi chu a ngaihawm viau dawn niin a sawi.

Ferrari CEO Louis Camilleri chuan Finnish driver Raikkonen hi la chelh zui zel a duh nia sawi a awm rualin, a hmaa CEO Sergio Marchionne chuan July thla khan Charles Leclerc hi thuthlung a lo ziahpui vek tawh niin an sawi bawk a. Ferrari team pawhin Marchionne duh dan hi kalpui an tum niin an sawi bawk.

Sergio Marchionne duh dan anga Ferrari hi an kal dawn a nih a, Leclerc hi an lalut a nih chuan Kimi Raikkonen hian hmun a ken a ngai dawn a. Heti a nih chuan team danga luh leh aiin a chawlh tawh a rinawm hle a, hei vang hian Hamilton chuan F1 khawvel tan chuan a khawharthlak tur thu a sawi a ni.

Lewis Hamilton chuan, “Kimi hi chawl ta se ka ngai ang em? Mimal tak chuan han inngaih vawng vawng te chu a ni chiah lo maithei a, mahse a ngaihawm ve viau dawn a. A bik takin he infiamna huang hi a tel lo chuan a khawharthlak dawn khawp mai,” a ti.

A sawi zelnaah, “Formula 1 ka luhchilh hma hian games velah ka khel nasa thei hle a, PlayStation a F1 ka khelh apiangin McLaren driver Kimi Raikkonen kha ka thlang ziah a, keimah ang hian ka chan ziah thin,” a ti bawk.

A sawi zelnaah, “McLaren car hmasa, Kimi duh dan anga an duan, a suspension hman thin te leh thil dang zawng zawng pawh kha ka la hre chiang hlawm em em a, engkim mai ka la hriat chian dan chu nimina mi ang vek a la ni a. Hun duhawm leh hlawhtling tak a hmang a, amah anga Finn driver ropui tak ka elpui thei hi lawmawm ka ti a ni,” a ti a ni.