29 Jan 2019 05:06

inkhel

F1 car thar tlangzarh hun tur an puang

Formula 1 season thar an tan dawn hnai ta hle a, team hrang hrangte chu theihtawp chhuahin an inpuahchah mek a. 2019 season chhunga an car hman tur chu team te hian an tlangzarh thei dawn tawh hlawm a, a tam zawk chuan an car thar tlangzarh hun hi an puang tawh a ni.

2019 season-a an car tlangzarh hun tur hi Formula One team 10 zinga team 6 te chuan an puang tawh a, tlangzarh hun tur la puang lo team 4 la awm te pawh hian an puang ve thei vat tura ngaih a ni.

Toro Rosso chuan car hi an tlangzarh hmasa ber dawn a, thla thar tir lamah niin, Renault chu a dawttu an ni a, Racing Point leh McLaren te chu a dawttu an ni a. Ferrari leh Sauber te pawhin an car tlangzarh hun tur hi an puang tawh bawk a ni.

McLaren chuan nikum khan an car chu serthlum rawng an puttir a, kuminah pawh hian serthlum rawng chu an la chhawm zel dawn a nih hmel hle a, tun hnaiah khan an Twitter account lamah chutiang lam hawi chu an post a ni.

Martini chuan Williams an sponsor tawh dawn lo a, hei vang hian Williams car ah pawh an hming a chuang tawh dawn lo a. Racing Point chu a neitu thar hnuaiah an tel chho dawn a, an hming pawh Force India tih ni tawh loin Racing Point a ni tawh dawn a, an car rawng tur a la sawi theih loh a ni.

Sauber leh Alfa Romeo te chu a kum hnihna atan an la inkawp dawn a, rawng var leh sen an la hman chhunzawm a rinawm a, rawng dumin a pawlh then leh nual tura beisei a ni.

A hnuaiah hian team thenkhatte car thar tlangzarh hun tur chu tarlan a ni a, Mercedes, Red Bull, Haas leh Williams te chuan an car tlangzarh hun tur hi an la puang ve chiah lo a ni.

11 February - Toro Rosso

12 February - Renault

13 February - Racing Point

14 February - McLaren

15 February - Ferrari

18 February - Sauber