Daniel Ricciardo chuan tun season-ah Formula 1 car tan inlehpelh a harsa nia sawiin, a hma zawng aiin F1 car te chu an hlai tawh zawk a, hei vang hian midang lehpelh a harsat phah tawh niin a sawi.

2017 atang khan Formula 1 car te hi an ti hlai deuh tawh a, hei vang hian Ricciardo sawi ang deuh hian a hma ang chuan an inlehpel nasa tawh lo a. Heng te avang hian mi tam tak chuan an sawisel nasa hle a. Kuminah Australian GP an tlan tawh a, khatah pawh khan sawi a hlawh hle.

Melbourne khawpuia Australian Grand Prix an tlan khan inlehpelh pangngai deuha sawi tur chu panga chiah a awm a. Red Bull driver Ricciardo chuan F1 thuneitute hnenah an kalphung chu thlak danglam leh turin a ngen a ni.

Ricciardo chuan, “Tunah hi chuan car a hlai tawh hle a, a ke pawh a hma aiin a hlai tawh zawk bawk a. Hetiang a nih avang hian car pakhat ringawt pawhin kalkawng a awh hnem mah mah tawh a ni,” a ti a.

A sawi zelnaah, “Hetiang ringawt hi chuan boruak tha hmuh tur a tlem a, track pawh hian a tuar vatin a rinawm a. Car zen zawk kha kei chuan fuh ka ti daih zawk a, bike ang deuhin a inlehpelh zung zung theih zawk a. A entu tan lah a hmuhnawm zawk daih lehnghal,” a ti bawk.