Formula 1 intlansiak boruak sang tak hnuaiah Sebastian Vettel chu pakhatna a ni hram a, tun season-ah vawi hnih an tlan tawhah a aia thleng hma an la awm lo.
Bahrain Grand Prix-ah hian Ferrari driver Vettel leh Mercedes driver Valtteri Bottas te inum a hmuhnawm hle mai a, a tawp dawn hnaihah phei chuan pakhatna ni tur zawk sawi thiam har khawpin an inum a, mahse a tir atanga hma hruaitu Vettel chu a dingchang ta zawk a ni.
Pole position atanga bul tan Vettel hian bul a tan tha viau a, an tlan tan deuh chauh tihin pahnihna atanga tlan tan, Vettel-a team-mate Kimi Raikkonen chu Bottas chuan a lehpel nghal a. Lewis Hamilton pawhin pakuana atanga bul tanin a tlan tha nghal viau a.
Sergio Perez leh Brendon Hartley te chu kawi 4-naah an in intai a, Red Bull driver Ricciardo pawh a car chian loh vangin a tlan chhunzawm thei lo a. Virtual Safety Car a inrawlh a ngaih phah a, hemi hnu hian Hamilton chuan a hmaa tlan Fernando Alonso, Hulkenberg leh Ocon te chu a lehpel zui a. Chu mai ni loin, Magnussen leh Gasly te chu a lehpel leh a, 4-naah a awm chhoh theih phah a.
Kimi Raikkonen chu pit-ah a lut a, tlan chhuak turin signal an pe a, a tlan leh chiah tihin a car ke hnung veilam bula ding mechanic Francesco Cigarini chu a chil a. Francesco hi damdawi inah an tlanpui nghal a, a ngal ruh a tliak a, an zai nghal bawk a.
He thil thleng avang hian FIA chuan Ferrari hi £44,000 an chawitir a, thuchhuah siam nghalin, “Thuneitute chuan Ferrari team te’n an car an chhuahtir leh dawn khan an inthlahdah zia an tilang a. Midangte tana hlauhawm takin an che a, mihring lakah pawi an khawih phah ta hial a ni,” an ti.
Raikkonen hi podium lawn ngei tura beisei a nih laiin, he thil thlen hnu hian a tlan chhunzawm ta lo a, Mercedes driver Hamilton-a lawmah a tla ve ta thung a. Hamilton hi pathumna ni chhoin, a tawp thlengin a dinhmun hi a inthlak ta lo a, podium a lawn thei ve ta a ni.
Sebastian Vettel hian point 50 a hmu ta a, amah hnaih bertu Lewis Hamilton aiin point 17 in a sang a, Valtteri Bottas aiin point 28 in a sang bawk a. 2004 hnulamah a vawikhatna atan Ferrari hian Formula 1 season tira intlansiak hmasa pahnihah pakhatna an nih ve ve theih leh hmasak ber tum a ni.
Result:
1 Sebastian Vettel - Scuderia Ferrari 1
2 Valtteri Bottas - Mercedes AMG Petronas Motorsport
3 Lewis Hamilton - Mercedes AMG Petronas Motorsport
4 Pierre Gasly - Red Bull Toro Rosso Honda
5 Kevin Magnussen - Haas F1 Team
6 Nico Hülkenberg - Renault Sport Formula One Team
7 Fernando Alonso - McLaren F1 Team
8 Stoffel Vandoorne - McLaren F1 Team
9 Marcus Ericsson - Alfa Romeo Sauber F1 Team
10 Esteban Ocon - Sahara Force India F1 Team
11 Carlos Sainz - Renault Sport Formula One Team
12 Sergio Pérez - Sahara Force India F1 Team