Formula 1 Azerbaijan Grand Prix qualifying an tlan zo a, Sebastian Vettel chuan pole position a chang.
Ferrari driver Vettel hian lap hnuhnung berah a tisual deuh a, mahse a aia second 0.2 a tlan chak zawk, a team mate Kimi Raikkonen chu a aia nasa zawkin a tlan sual a, hei vang hian Vettel chan hi a that phah ta a, Pathiannia an intlansiak hunah a ding hma ber dawn a. Kimi Raikkonen erawh chu parukna atangin a tlan tan ve dawn chauh a ni.
Sebastian Vettel hnungah hian Mercedes driver pahnih an ding dawn a, Lewis Hamilton chu pahnihnaah awmin, a teammate Valtteri Bottas chu pathumnaah a awm dawn bawk a. Anni hnungah hian Red Bull driver pahnih an awm ve leh dawn a, Daniel Ricciardo leh Max Verstappen te chu Raikkonen aiin an ding hma chiah dawn a ni.
Force India chuan tun season-a qualifying result an neih that ber tum an tawng a, Raikkonen hnungah an awm dawn a. Esteban Ocon chu pasarihnaah a ding ang a, a teammate Sergio Perez chu pariatnaah a ding ang.
Renault driver pahnih chu top 10 ah an lang pha chiah a, Nico Hulkenberg chu pakuanaah awm tur niin, a teammate Carlos Sainz chu sawmnaah a awm bawk a. Hulkenberg hian a gearbox a thlak avangin an hrem dawn a, qualifying-ah 9-naah awm mahse intlansiak hunah chuan 14-na atangin bul a tan dawn thung.
Williams pawh tun season-ah chuan qualifying-a an chet that ber tum niin Lance Stroll chu 11-naah a awm a, Sergey Sirotkin chu 12-naah a awm bawk a, Hulkenberg an hrem zarah intlansiak hunah chuan 10-na leh 11-na atangin bul an tan thei ang.
McLaren chu beisei angin an la che fuh thei chuang lo a, Fernando Alonso chu 13-naah awmin, a teammate Stoffel Vandoorne phei chu Q1 a paltlang zo lo a. Kuminah McLaren in Q2 an thlen phak loh hmasak ber tum a ni.
Azerbaijan GP Qualifying:
1. Vettel (Ger) Ferrari
2. Hamilton (Gbr) Mercedes
3. Bottas (Fin) Mercedes
4. Ricciardo (Aus) Red Bull
5. Verstappen (Ned) Red Bull
6. Raikkonen (Fin) Ferrari
7. Ocon (Fra) Force India
8. Perez (Mex) Force India
9. Hulkenberg (Ger) Renault
10. Sainz (Spa) Renault
11. Stroll (Can) Williams
12. Sirotkin (Rus) Williams
13. Alonso (Spa) McLaren
14. Leclerc (Mon) Sauber
15. Magnussen (Den) Haas
16. Vandoorne (Bel) McLaren
17. Gasly (Fra) Toro Rosso
18. Ericsson (Swe) Sauber
19. Hartley (Nzl) Toro Rosso
20. Grosjean (Fra) Haas No Time