01 Dec 2018 04:31

inkhel

F1 atangin Force India hming a bo ta

Formula One season thar atangin Force India hming chu a tel ve dawn tawh lo a, kum 11 zet intlansiakna khawvela an lo tal ve tawh hnuah an team chuan hming thar an nei tawh dawn a ni.

Britain rama inbun Force India team te chuan Zirtawpni khan FIA hnenah an team hming thar tur hi an thehlut tawh a, season thar atang chuan Racing Point F1 tih hming an pu tawh dawn a. An chassis hming chu Racing Point tiin an ziak lut a, an company hming hi Racing Point UK Limited tiin an ziak bawk.

2008 khan Indian beer baron Vijay Mallya chuan Spyker F1 a lei a, an hming chu Force India tiin an thlak a. An tlakchhiat chhoh avangin kumin August thla khan Canadian billionaire Lawrence Stroll chuan a lei ta a ni.

Lawrence Stroll hnuaiah hian 2018 season chawhnu lamah khan Racing Point Force India team tiin an tel chhunzawm a, a hmaa Vijay Mallya leh Sahara Group hnuaia Sahara Force India tih kha chu an hmang zui lo hrim hrim a ni.

Ferrari official team hming pawh an tidanglam hret dawn a, Scuderia Ferrari Mission Winnow tih a ni tawh dawn a, Haas pawh Rich Energy Haas F1 team tiin an sponsor te hming lang telin an tidanglam dawn bawk a ni.

2019 ah chuan Formula Two champion George Russell pawh a tel tawh dawn a, George Russell hian Williams car a khalh ang a, number 63 chu a chang dawn a. McLaren rookie Lando Norris chuan car number 4 a chang dawn bawk a ni.

Polish driver Robert Kubica chu 2011 khan rally-ah a chesual a, nunna a chan lo hlauh a. Intlansiak khawvel atanga kum 8 zet a reh hnuah season tharah a rawn let leh dawn a, Williams car khalhin number 88 a chang dawn a ni.