F1-ah flag tial an hmang tawh dawn lo

22nd October 2018, 10:10PM

Formula One chuan hun rei tak an lo kalpui tawh, intlansiak tawpnaa flag tial (chequered flag) an lo vai thin chu hmang tawh loin light signal hman tan an tum.

Paris khawpuia World Motorsport Council thukhawm chuan chequered flag chungchang hi an sawiho a, kum thar atang chuan intlansiak tawpnaah flag hi hmang tawh loin light signal hman ni tawh se tiin thutlukna an siam a. An ruahman dan chuan light signal hman a nih rual hian flag tial pawh hi an la vai ve hrim hrim dawn a ni.

FIA chuan thuchhuah siamin intlansiak tawpnaa flag tial an vai thin chu la vai chhunzawm ni dawn mahse, intlansiak tawpna a ni tih lantirna atan light signal an hman tawh dawn thu hi an tarlang a ni.

Tuna dan an hman mekah chuan flag tial chu intlansiak a tawp a ni tih hriatna atan an vai thin a, lap tlan tur zat aia tlem pawh la tlan mahse flag tial an vai tawh chuan intlansiak chu a tawp a ni tih an hre chiang tlang vek a ni.

Kumin khan model Winnie Harlow chuan flag hi a lo vai hma leh lutuk a, hei vang hian Montreal khawpuia Canadian Grand Prix-ah an buai phah deuh nuaih a. Hetiang boruak a thlen leh hlauhthawn thilah ngaihtuahna thar hi an hman phah niin a lang a ni.

F1 intlansiak tawpnaa flag vai tur hian milar an lo sawm tawh thin a, 2011 khan cricket legend Sachin Tendulkar chu flag vai tur hian an lo ti tawh a. Delhi khawpuia Indian Grand Prix intlansiak an neih tan khan F1 ngaisangtu nia inchhal Sachin hi flag vai tur hian an ruat a ni.

Football legend Pele pawh 2002 Brazilian Grand Prix ah khan flag vai turin an lo ruat tawh bawk a. Pele pawh hi a che fuh lo hle a, official te nen an lo titi nasat deuh avangin a hun takah flag hi a vai hman lo.

FIA Formula 1 race director Charlie Whiting chuan, “Kum thum chhung chu chequered light signal hi kan lo hmang tel ve tawh a, light dum leh var hi kumthar atang chuan kan hmang tawh dawn a, flag tial erawh a la awm ve zel dawn tho a. Hetianga kan tihna chhan chu Montreal khawpuia thil thleng vang kha a ni ber,” a ti.

Copyright © inkhel.com 2024. All rights reserved.