Exhibition-ah chiah ka inlan tawh dawn: Mayweather

21st November 2019, 01:11AM

Floyd Mayweather chuan boxing ring chhunga a kir leh a nih pawhin exhibition match-ah bak a nih loh tur thu a sawi.

Boxer ropui Floyd Mayweather hian 2018 kum tawp lamah khan boxing ring a luhchilh leh a, hetah hian Japanese kickboxer Tenshin Nasukawa chu round khatnaah hnehin £7 million zet chu a hlawh phah a. Hemi hma hian kum khat vel chu Mayweather hian inhnek a chawlhsan thu hi a lo puang tawh a ni.

Tenshin Nasukawa nen an inhnek hma hian UFC star Conor McGregor nen an lo inhnek tawh bawk a, hemi hnuah hian chawlh tak tak a tum tawh thu hi a puang zui a ni.

Featherweight kickboxer Nasukawa a knock-out hnuah hian Mayweather chuan professional boxing chu a la chawlhsan reng thu a sawi zui a. Hetih rual hian sum tam tham tak a hlawh theihna tur exhibition match erawh a la awm nual dawn niin a sawi thung.

Mayweather chuan, “Boxing ring chhunga kir leh tura min betu hi an awm nual a, hetih lai hian ka hriselna hi ka hausakna a ni tih hi ka ngaihdan a ni ve thung,” a ti.

“A nihna takah chuan boxing hi infiamna rothap zet mai a ni a. Tun hnaiah boxing ring chhunga boxer thi an awm zeuh zeuh a, hei hian thil namai lo tak a nihzia a tilang chiang hle a. Infiamna a nih rual hian nunna atan pawh a hlauhawm pha a ni tih hi hai rual a ni lo,” a ti bawk.

A sawi zelnaah, “Chawlh hun hi hriat a tul a, ka vanglaiin hun ka hmang tha hle a, tunah chuan ka chawlh ve hi a hun tawh a. Ka la zin kual reng ang a, exhibition match vel pawh ka la khel zel dawn a. Hetiang exhibition match atang hian pawisa ka la lut tha thei a, $10 million atanga $30 million vel chu ka la lut thei zel a. Fighter tam zawk ai hi chuan pawisa hi ka la lut hnem chiang a ni,” a ti.

Kumin June thlaah khan Mayweather hian Tokyo khawpuiah TMT Japan (The Money Team) a tlangzarh a, hetah hian exhibition match a khelh leh tur chungchang an ngaihtuah nghal niin a sawi.

Nasukawa nen an inhnek theihna atana hma latu MMA promotion RIZIN te chuan American boxer hi thawhpui leh an duh a. An thawkho leh a nih chuan Mayweather hian kickboxer tho emaw, MMA fighter emaw a hmachhawn a ngai dawn niin an sawi a ni.

Copyright © inkhel.com 2024. All rights reserved.