Everton chuan nimin lam khan tunlai forward naupang zinga duhawm ber pawl Moise Kean chu Juventus atangin an lalut fela, Kean hian jersey no.27 a ha ang.

Everton hian kum 19 mi Kean hi kum nga daih contract an ziahpuia, Italian forward manah hian pound maktaduai 25.17 (euro maktaduai 27.5) an senga, add-ons ah Toffees hian pound maktaduai 2.2 (euro maktduai 2.5) an la sen belh dawn bawk. Everton hian Kean-a man hi kum thum chhungin an pek tlak a ngai dawn a ni.

Kean hi tun nipui chhunga Everton player lakluh thar pangana a ni a, Everton hian Andre Gomes, Fabian Delph, Jean-Philippe Gbamin leh goalkeeper Jonas Lossl-te an lo lalut tawh.

Goodison Park-ah Kean hian kar khatah pound 52,000 a hlawh dawn niin chanchinbu mite chuan an tarlanga, a contract-ah hian buy-back clause a awm lo niin tarlan a ni bawk.

Kean chuan Juventus a zawm chungchang sawiin, “Everton kawr ka ha thei hi ka inchhuangin ropui ka ti hle a, he team tan hian ka theitawp ka chhuah dawn. Everton hian an hmalam hun thui tak an thlir a, kei pawhin chuti ang rilru chu ka put avangin he hmunah hian ka lo lut a ni.

“He club hi a len zia ka hria a, an hmachhawp pawh a liantham hle a, an duh a hlawhtlin theih nan rim takin ka thawk ang. Hnehna chan hi ka tan thil thar a ni lo hle a, chu ka rilru puthmang chu he team-a rawn ken luh hi ka duha, khelmual chhungah tha taka ka khelh theih ka beisei a, kan supporter-te mit tih tlai ka chak tawh hle a ni,” a ti.

Kean hi kum 2010 atang khan Juventus academy-ah a awm tawh a, Verona-a season khat loan-a a chhuah zuai bak chu Juventus-ah a awm reng thin. Season liamta khan Juventus tan Serie A-ah Kean hian game 13 khelin goal ruk lai a khunga, a che tha hle.

Kum 2016 khan Juventus senior team tan a khel tan a, hemi kum hian Juve tan Serie A leh Champions League lamah a inlana, kum 2000 hnu lama piang zinga Europe league lian panga zingah a khawi emaw bera inlan thei hmasa ber a nih bakah Champions League lamah pawh kum 2000 hnu lama piang zingah inlan thei hmasa ber a ni bawk.

Kum 2017 khan Juve tan Serie A-ah goal a khunga, kum 2000 hnu lama piang zinga Europe league lian pangaa goal khung thei hmasa ber ni lehin, Italy tana goal khung thei naupang ber dawttu a ni mek bawk a ni.