Everton enkawl tura rinkai ber zing ami chu Marcelo Bielsa hi niin chanchinbu mi thenkhat chuan an tarlang a, a hmain he Argentine manager hian he hna hi chelh tur angin alo insawi tawh bawk.

The Toffees te hian thla thum chhung vel chu chak mumal an neih loh avangin an manager Frank Lampard chu an ban a. Premier League table-ah pawh a tawp ber dawttuah awmin, an hnuai chiaha awm Southampton aia goal difference a an san vang chauhin a chung zawkah hian an awm.

Lampard thlaktu tur hian Everton hian ban mai tawh loh tur manager thar an dap nasa hle a, chung zingah chuan Sean Dyche, Wayne Rooney, Duncan Ferguson, Nuno Espirito leh Valencia manager hlui Marcelino te hi Everton manager ni thei tura hming chhawp chhuah te an ni.

Hetihlai hian Everton hian Bielsa chhawr tur hian inbiakna an kalpui tan tawh niin an tarlang a, chuvang chuan kum 67 a upa Bielsa hian kum 69 a nih thlenga English club lian hi enkawl a inhuam niin an tarlang tel bawk.

Bielsa hian Leeds United a chhuahsan hnuah thla 12 dawn chu club enkawl nei loin a lo awm tawh a, Leeds a chhuahsan hma chiah hian Premier League relegation zone-ah awm lo vel chiah chiahin an awm.

Kum 67 a upa Bielsa hi nikum lam khan Bournemouth in an manager tur atan an be tawh bawk a, mahse Bournemouth hian Gary O'Neil chu head coach atan ruat leh siin, August thla tawp lamah khan Scott Parker a thlak.

Bielsa hian team hrang hrang a lo enkawl hnem tawh hle a, chung zinga langsar zual te chu RCD Espanyol, Argentina, Chile, Athletic Bilbao, Marseille, Lazio, Lille leh Leeds United te hi an ni.