Everton khelmualah Manchester United an leng lut a, mual neitute hian goal 4 ngawt an lo thun a, Ole Gunnar Solskjaer leh a pawlte an tlawm chiang hle.
Manchester United chet fuh loh a kal tluang a, UEFA Champions League quarter final-ah Barcelona in an zinkawng an titawp deuh chauh a, ni nga a liam hman chiah tihin Everton chuan Goodison Park-ah 4-0 ngawtin an lo sawp zui leh a ni.
Toffees tan hian Richarlison leh Gylfi Sigurdsson te chuan first half chhungin goal khat ve ve an thun a, second half-ah Lucas Digne leh Theo Walcott te chuan goal khat ve ve an thun ve leh bawk a ni.
Everton (4-2-3-1): Pickford 6; Coleman 7, Keane 6, Zouma 6.5, Digne 7 (Jagielka 84); Schneiderlin 6, Gueye 6.5 (McCarthy 76 6); Richarlison 6.5 (Walcott 51 6.5)`Sigurdsson 8.5, Bernard 7.5; Calvert-Lewin 6.5
Subs: Tosun, Stekelenburg, Davies, Lookman
Goals: Richarlison 13, Sigurdsson 29, Digne 55, Walcott 64
Booked: Gueye
Manager: Marco Silva 7
Manchester United (4-1-2-3): De Gea 6.5; Dalot 6, Smalling 5.5, Jones 5 (Young 46 6), Lindelof 6; Matic 5.5, Fred 5.5 (McTominay 6), Pogba 6; Rashford 6 (Perreira 77 5.5), Lukaku 5, Martial 6
Subs: Sanchez, Mata, Lingard, Romero
Booked: McTominay
Manager: Ole Gunnar Solskajer 6
Referee: Paul Tierney 7
Attendance: 39,395
Lucas Digne ball tauh phei chu Dominic Calvert-Lewin chuan a lo khawih leh chhawng a, heta ball kal zel hi Richarlison chuan Manchester United goal-ah a lo volley lut a. Brazilian forward hian David De Gea chu a hma pawhin a chhaih buai tawh a, Everton chu hma a hruaipui nge nge a ni.
First half hun chanve an khel a, United chuan goal thun theihna hun chu an insiam ve a, Paul Pogba ball pek chu Marcus Rashford chuan goal chungah a lo pet a. Hemi hnu hian United buaina chu belhchhahin a awm zui a.
United chuan corner an hlawh a, heta ball kal hi Everton chuan lain Gylfi Sigurdsson chuan vei lam sir atangin United goal lamah chuan a la phei a, yard 25 atangin goal a thun a, Everton chu 2-0 in hma a hruaipui zui a ni.
Half time thlengin team pahnihte hian goal dang an thun belh ta rih lo.
Second half an khel leh a, rei pawh an innawr leh hmain goal a lut leh nghal a. Minute 55 velah Lucas Digne chuan Everton goal thumna a thun a, David De Gea chu a che hman lo hle.
Gylfi Sigurdsson bawk a inlar leh a, United tlar hnung lama awmte chu a pal darh leh a, substitute Theo Walcott chu ball pein, Arsenal player hlui Walcott chuan United goal-ah chuan a thun ve leh a, 4-0 a nih theih phah a ni.
Hun tawp thlengin goal dang a luh belh ta lo a, Everton chuan Manchester United chu 4-0 ngawtin an sawp a, Premier League club chungnung pali zinga United in tel an tumna chu a beiseiawm lo tan mek a. Premier League bikah Everton hian Manchester United an hneh nasat ber tum a la ni.
Red Devils hian Jose Mourinho thlaktu Ole Gunnar Solskjaer hnuaiah game 17 an khelhah goal 17 an chhuah ta a, tun season chhungin beisei tur an nei chau tawh hle a. March thla khan FA Cup-ah Wolves an hneh lo a, Europe khawmualpuia inelna sang berah Barcelona chuan 4-0 in an hneh bawk a ni.
United hian match 11 chhung chu an goal an venghim thei tawh lo a, November leh December 1998 hnua hetiang chen goal an venhim theih loh hmasak ber tum a ni.
Everton chuan kar leh Inrinni khian Crystal Palace an tlawh ang a, Manchester United chuan Nilai zan hian Old Trafford-ah Manchester City an lo mikhual dawn a ni.