Everton-in Zaha manah £70m leh player pahnih an thehchhuak

07th August 2019, 09:08PM

Everton chuan Crystal Palace winger Wilfried Zaha chu lakluh an tum hle niin a langa, pound maktaduai 70 bakah player pahnih nen Crystal Palace hi an dawr.

Everton hian pound maktaduai 70 bakah hian an player pahnih James McCarthy leh Cenk Tosun-te chu Zaha manah hian Palace chu pe phal mahse Palace hian an lo hnawl tih Sky Sports chuan a tarlanga, Palace hian an winger manah hian pound maktaduai 80 aia tlem chu engti kawng maha pawm an tum lo tih tarlan tel a ni bawk.

Zaha hian Palace hi chhuahsan a duh hle a, mahse Palace hian a man an chhiar to em avangin lei ngam an la awm rih lova, hemi avang hian Zaha pawh hi Palace lakah a lungawi lo hle niin sawi a ni.

Zaha hi Arsenal chuan Nicolas Pepe an lakluh hma khan an lo dawr tawh a, mahse Palace chhairna zat hian Arsenal chuan Zaha hi an ngam lova, bansanin Pepe an lalut ta zawk. Zaha hi Napoli nen pawh sawizawm ni mahse sawi zui a hlawh lo hle a, club hnihte inkarah indawrna tak tak a awm lova ngaih a ni.

Everton hian Juventus atangin Moise Kean an lakluh hnuah Zaha hi an dawr chhunzawm a rinawm tawh lo viau na in, nimin lam khan an dawr leh tho niin a langa, Zaha manah hian pound maktaduai 80 an thehchhuak ngam dawn em tih chu zawhna lian tak a ni mek a ni.

Copyright © inkhel.com 2024. All rights reserved.