27 Aug 2015 05:17

Inkhel

Mizo Sports Website hmasa ber

Everton in Stones chhuah dilna hnawl dawn

Everton manager Roberto Martinez chuan defender John Stones-a'n chhuah a dilna chu club in a hnawl tur thu a sawi.

£20m, £26m leh £30m te a Chelsea in Stones an dawrna Everton in an hnawl hnuah kum 21 a upa England international hian Thawhlehni khan chhuah a lo dil tawh a ni.

Chelsea in vawithum lai Stones an dawrna Everton in hnawlsak tawh mahse transfer window a inkhar hma chu an beidawng duh dawn lo niin a langa, £40m in lei an tum leh dawn niin report a awm leh ta bawk.

Sum hian engkim a lei thei lova, a nihzia Everton hian entirna kan pe dawn a ni. Tun hun hi sum vanga inthawm that hun pawh a ni lo ve tiin Martinez chuan a sawi.

Everton in League Cup second-round a Barnsley an hneh tum khan Stones hian a start mai bakah hun pumin a inkhel a ni. Martinez hi Mourinho-a'n a ti thinur deuh tawh ni maiin a langa, Stones chhuah lohna turin Everton chairman Bill Kenwright-a'n theihtawp a chhuah a rin tlat thu Everton boss chuan a sawi.

Chairman tha tak kan neia, club tana dik tur chu a tih mai ka ring. Sumin a khawih chet kan ring phal lova, team chhiatna tur a tih kan ring lo bawk. Football nuam taka a khelh zel theihna turin Stones chungah pawh theihpatawp kan chhuah zel ang tiin Martinez chuan a sawi chhunzawm bawk.

February 2013 khan Stones hian Barnsley atangin £3m in Everton a zawma, August 2014 khan contract thar ziakin kum li a contract ah hian a la nei a ni.