13 Sep 2020 11:20

bakteaJr.

Mizo tlangval

​Everton-in London-ah Spurs an hneh

Merseyside club Everton chuan tun season atana an Premier League game hmasa berah, London club Tottenham an tlawha, Everton hian Tottenham Hotspur Stadium-ah si khat faiin hnehna an chang.

Goal awmchhun hi Everton striker Dominic Calvert-Lewin a thun a ni a, ani hian second half-ah goal pawimawh tak khungin, Everton-in inkhel awlsam lo takah point 3 an hawn.

Inkhel hmuhnawm pangngai tak a ni a, chance pawh awm nual mahse goal lut erawh pakhat chauh a ni. First half-ah Richarlison chuan Everton hmahruaipuina hun tha em em a nei a, chak taka tlanin, Alderweireld-a ball lak tur a lakkhalh, Hugo Lloris chiah a hmaah awm tawhin a bum tlang leha, mahse goal a pet khum luaha, pound maktaduai 50 man lai tih atan chuan a dek ho hle.

First half-ah hian Tottenham lam pawhin chance tha tak tak an neia, Dele Alli leh Matt Doherty te chance neih chu Everton goalkeeper Jordan Pickford chuan a save sak ve ve. Everton player thar James Rodriguez a inlan nghala, England-a a game hmasa berah a khel chhe lo nghal hle a, a lakah beisei a sang hle.

Second half-ah minute sawm vel a kalin, Everton hian hma an hruaia, freekick atangin Barcelona leftback hlui Lucas Digne chuan Spurs box chhungah dik em emin ball a vawrh luta, Calvert-Lewin chuan goal-ah lo tauh lutin, inkhela goal awmchhun a khung.

Everton tan hian an player thar pathum James, Doucoure leh Allan te chuan inkhel bul an tan vela, Spurs tan an player thar pahnih Doherty leh Hojbjerg te chuan inkhel bul an tan bawka, an khel chhe lo tlang hle a tih theih awm e.

Tottenham 0-1 Everton

(Calvert-Lewin 55’)

Player Ratings

SPURS: Lloris (6), Doherty (6), Alderweireld (5), Dier (4), Davies (5), Hojbjerg (4), Winks (4), Alli (3), Son (6), Kane (5), Moura (6). Subs. Sissoko (5), Bergwijn (4), Ndombele (n/a)

EVERTON: Pickford (8), Coleman (7), Mina (7), Keane (7), Digne (7), Allan (8), Gomes (7), Doucoure (7), James (8), Richarlison (7), Calvert-Lewin (7). Subs. Sigurdsson (6), Davies (n/a), Kean (n/a)