Everton chuan an defensive midfielder Idrissa Gana Gueye chu Paris Saint-Germain laka an chan hnuah a thlaktu tur an lalut ve leha, Bundesliga lam player an lalut.

Everton hian German club Mainz atangin defensive midfielder Jean-Philippe Gbamin chu an laluta, Toffees hian Gbamin-a mana an sen zat hi puanzar a ni lova, kum nga daih contract an ziahpui.

Ivory Coast international Gbamin hi centre-back ah pawh a khel thei a, season liamta khan Mainz tan Bundesliga-ah game 32 khelin goal hnih a khung.

Kum 23 mi Gbamin hi French club Lens academy-ah a awm thina, kum 2016 thleng kha Lens senior team lama a khelh hnuah Mainz chuan an leia, an player pawimawh a ni chho.

Gbamin chuan Everton a zawm chungchang sawiin, “Ka tan chuan hun ropui tak a ni a, ka tah te pawh a chhuak; tunah chuan min lei chhan hi khelmual chhungah kan lan tir a ngai a ni. Everton hi England-a club ropui tak an nih avangin ka phur hle a, history ropui tak an neih bakah an hmachawp pawh hi ka mil hle a, min dawr khan inngaihtuah buai miah lovin he hmuna lo luh hi ka thlang nghal a ni,” a ti.

Tun nipui chhungin Everton hian Gbamin bakah midfielder pahnih dang an lalut tawh a, Fabian Delph chu Manchester City atanga an lakluh bakah Andre Gomes chu Barcelona atangin an lei tawh bawk. Everton hian tun nipui chhungin goalkeeper Jonas Lossl pawh an lalut tawh a ni.