Everton chu manager thar Rafael Benitez-a hnuaiah season thar atan an inbuatsaih mek zela, an squad pawh thawm tha mek zelin, English winger Demarai Gray chu Bayer Leverkusen atangin an la dawn niin a lang.

Gray hian nimin lam khan Everton-ah medical a nei fel tawh niin English chanchinbu thenkhat chuan an tarlanga, a manah Everton hian pound maktaduai 1.5 vel an seng dawn nia tarlan a ni bawk.

Kum 25 mi Gray hi Birmingham academy chhuak a ni a, kum 2016 khan Leicester City-in an leia, kumin January thla khan German club Leverkusen hian Leicester atangin la ve lehin thla 18 daih contract an ziahpui.

Nimin mai khan Everton hian Andros Townsend chu free transfer-in an laluta, Florida-a pre-season tour nei tura an kal hma in Gray leh goalkeeper Asmir Begovic te an lalut leh dawn niin a lang mek.

Everton lak tur dang Begovic hian a khelh mekna Bournemouth-ah kum khat daih contract a la neia, Goodison Park-ah hian Jordan Pickford-a thachhangdawltu ni turin a inpu dawn niin lang a ni.