​Everton-in Gomes an lei nghet dawn

20th June 2019, 06:06AM

Everton chuan Barcelona atangin Portuguese midfielder Andre Gomes chu an lei nghet dawn a, club hnihte inkarah inremna a awm tawh niin Sky Sports chuan a tarlang.

Gomes-a mana Barcelona leh Everton inremna hi pound maktaduai 22 a nih thu tarlan a ni a, official-a an in lakluh thuai a rinawm.

Gomes hian tun season hman zawh takah khan Barcelona atangin Everton-ah hian loan-in a khel a, vawi 29 lai inlanin, a khel chhe lo thin viau. Everton mit a tlung tih a langa, Goodison Park-ah a nghetin a lut chhunzawm dawn.

West Ham chuan kum 25 mi Gomes hi tun nipui bazar inhawn tirh khan lakluh an tum ngawrh hle a, vawi hnih dawrin Barcelona in an lo hnawl sak ve ve. West Ham hian a tirah Gomes hi pound maktaduai 18 in an dawr phawta, hnawlsak an nih hnuah pound maktaduai 20 in an dawr leh a, an hlawhtling ta chuang lo.

Kum 2016 khan Gomes hian Valencia atangin Barcelona a zawma, a manah Barca hian 41.7 lai seng mahse beisei a pha lem lo. Camp Nou-ah kum hnih dang contract la nei mahse Barca hian hralh an remti ta a ni.

Camp Nou-a kum hnih a cham chhungin Gomes hian Barca tan game 78 a khel hmana, La Liga title pakhat leh Copa del Rey title pahnih a lakpui hman a ni.

Copyright © inkhel.com 2024. All rights reserved.