​Everton-in Gomes an lalut fel

26th June 2019, 02:06PM

Andre Gomes chuan Barcelona atangin season hmasaa loan-a a khelhna Everton chu a nghetin a pan fel ta a, a manah Everton hian pound maktaduai 22 sengin kum nga daih contrat an ziahpuia, kum 2024 thleng tal Everton tana khel tura ngaih a ni.

Sawilan angin season liam ta khan Gomes hian Everton hi loan-in a zawm a, a khel chhe lova, vawi 29 inlanin Everton hi pariatnaah an awm.

Everton tana a khelh that thin avangin West Ham pawhin lakluh an duh hle a, tun bazar chhung khan West Ham hian Gomes ho vawi hnih dawrin Barcelona chuan an lo hnar sak ve ve.

Everton manager Marco Silva chuan Gomes an lakluh chungchang sawiin, “Season liamta khan Andre hi kan tana player pawimawh tak a ni a, a mah pawh hi nasa takin kan puiin ka hria. Andre kan lalut nghet thei hi thutlukna dik tak niin ka hria a, tun bazar chhunga kan tih tur pawimawh ber zinga kan dah a ni hrim hrim a ni,” a ti.

Kum 25 mi Gomes hi Benfica academy lamah a awm thin a, season khat chhung Valencia-a loan a a khelh hnuah kum 2015 khan Valencia hian an la nghet. Valencia-ah hian che tha chho viauin kum 2016 khan Barcelona chuan an laluta, Barca-ah erawh beisei a pha lo va, duh angin a khel tam lo hle.

Everton hian ‘risk’ la in Gomes hi loan in an lalut a, a chet that tak avangin an la nghet zui. Gomes hi kum 2014 atang khan Portugal senior team tan a khel tan a, a ram tan hian game 29 a khel tawh a ni.

Copyright © inkhel.com 2024. All rights reserved.