Everton-in Digne contract thar an ziahpui

24th February 2021, 11:02PM

Everton chuan an left-back kum 27 mi Lucas Digne chuan kum li daih contract thar ziahpuiin, Digne-a contract thar hian kum 2025 nipui thleng a daih.

French defender hian kum 2018 khan Barcelona atangin Everton hi a zawma, Everton tan game 97 khel tawhin, goal nga a khung tawh bakah assist 19 a nei tawha, Premier League left-back tha ber zinga mi a ni.

Digne chuan contract a ziah chungchang sawiin, “A tir atangin fans te’n min ti tlangnel nghala, min ngaina tih an tilanga ka tan hla an phuah nghe nghe. Ka lawm em em a, ka tan a pawimawh em em bawk.

“Club hian hmachhawp lian tak kan nei a, tun season pawh tha takin kan khar theia, a lehpek zel tur pawh hmachhawp kan nei mek. Europe-a khelh ka duh a, chumi tur chuan Everton aia hmun tha a awm chuang lo.

“He club ka zawm hnu hian kumtin maiin hmasawnna ka hmu a, team tha tak kan indin mek bawk. Everton kan zawm a nih chuan inneihna lawmawm tak ang mai a ni. Nitin hian theihtawp ka chhuaha, Evertonian-te hi ka hmagaih tih ka lan tir thina, min hmangaihna chhan let hi ka duh ber a ni. Everton tana khelh zel hi ka duh tih ka chianga, contract thar ka ziak ta a ni,” a ti.

 

Copyright © inkhel.com 2024. All rights reserved.