Premier League vawi 19-na an khelh mek laiin Everton fan-te lungawi lo chuan kar kalta mai khan Moshiri leh board of director-te bang turin an nawr.
Merseysider-te hian an game khelh hnuhnung 14-ah vawi 1 chiah hnehna an chang a, manager Frank Lampard chu thawhtanni khan bantir a ni.
Moshiri chuan fan-te hrehawm tawrh a hriatthiam thu leh an thlawpna nei let leh turin eng thil pawh tih an huam thu a sawi.
Nipui bazar hnuhnung berah khan Manchester United leh Chelsea chief executive hlui Peter Kenyon chuan Everton lei turin inbiakna a kalpui a, mahse club chuan thui zawka inbiakna kalpui duh loin, Moshiri chuan club chu zawrh lai a nih loh thu fan-te hnehah a lo sawi tawh.
Mahse Moshiri chuan £500m-in Everton chu a zuar leh a, ngaihventu pawh an awm nual niin Guardian chuan a tar lang.
Inrinnia West Ham United laka an tlawm hma leh Lampard a chhuah hma khan Everton Fan Advisory Board nen interview neih a ni a. Hemi tum hian Moshiri chuan Stadium thar atana an sum dinhmun tihpun chauh a tum thu a sawi.
"Club hi zawrh lai a ni lo. Mahse stadium thar atan investor liante ka titi pui. Keimah pawhin ka tithei a, mahse sport-a investor lian tak takte Everton lama hruai luh ka duh. Inremna pawh siam fel a ni tep e.
"Chu chu club hralh lam a ni lo a, commercial development lam zawk a ni a. Club himna tur zawk a ni," tiin Moshiri chuan a sawi .
Thlawptute lungawi lohna karah Moshiri chuan club board, chairman Bill Kenwright leh chief executive Denise barrett-Baxendale-teah rinna a nghah thu a sawi a, anni hi Southampton an mikhual tum khan an him zawk nan tel ve phalsak an ni lo nghe nghe.
British-Iranian businessman hian an harsatna ata Everton chu hruaichhuah a tiam a, an lama tang reng turin fan-te a ngen nghal bawk.
"Board hi ka ring tawk a, hun hma lamah director leh appointed director-te pawh ka lo ban tawh. Thil tihdanglam hi ka hreh hran lo. A tul a nih chuan kan thlak danglam fo ang.
"Kan zaidam deuh a ngai, khelmualah pawh kan dinhmun pangngai aia kan inphahhniam a ngai. Fan-te tawrhna hi ka hrethiam a, an thu sawi pawh ka ngai pawimawh. An thu hian awmzia a nei a, a tul dan ang zelin zawm zel pawh kan tum ang.
"Club tan hian ka inhlan pum hlum a, fan-te puihna kan mamawh hle a ni. Everton tan hian fan-te hi an pawimawh ber a, hun harsa hi kan paltlang ho a tul, kan tan rual chuan kan paltlang ho thei bawk.
"Everton hi Goodison leh mi 12-ah a innghat a, thinlung zawng zawnga min support-tu fan-te tel lo chuan kan chak tawk lo. Fan-te thlawpna dawng nawn leh turin theihtawp ka chhuah ngei ang," tiin Moshiro chuan a sawi a ni.