Alex Iwobi chuan Arsenal chhuahsana Everton a zawm hnuah a club tharah chuan hming chher a tum hle niin a sawi.

Kumin nipui transfer window inkhar niah khan Alex Iwobi hian Toffees hi a zawm a, Everton player lak luh pasarihna niin, a hma hian Jean Philippe Gbamin, Moise Kean, Andre Gomes, Fabian Delph, goalkeeper Jonas Lossl leh Djibril Sidibe te an lo la lut tawh bawk a ni.

Kum 23-a upa Iwobi hian Goodison Park chu kum nga chhung awm chilh phawt turin contract a ziak a, a tira an inleina hi £28 million niin, eng eng emaw belh neuh neuh a nih hnuah a man hi £34 million velah a pung chho thei dawn a ni.

Nigerian winger Iwobi hi Arsenal academy atanga inzir chhuak niin, first team lamah hmun a chang chho a, Gunners senior team tan game 149 zet chu a khel hman a, hengah hian goal 15 chu a thun hman a ni.

Unai Emery chuan season hmasaah khan Iwobi hi a chhawr hnem hle a, a naupan lai atana a lo tal tawhna hmun kalsana hmun dang a pan tak chungchang chu a sawi chhuak nual a ni.

“Everton manager Marco Silva leh Marcel Brands te chu ka bia a, anni hian min thlem thiam bawk a, ka rilru chu an hneh hma khawp mai,” tiin Alex Iwobi chuan a sawi.

“An thil min chhawpsak chu hnar harsa khawpin a tha a, manager pawhin ka tan khelhna hmun a awm thu min hrilh bakah duat taka min enkawl a intiam bawk a. Hetiang tak hi player te chuan kan lo beisei thin a ni a, hei bak baka duhthusam a awm chuang lo tih theih a ni,” a ti bawk.

A sawi zelnaah, “Arsenal-ah khan naupang tia sawi ka hlawh hle a, tuna ka khelhna ka thlak takah chuan naupang ang chauha hriat ka nih tawh bik loh ka beisei a. Premier League-ah hming ka chher chhoh theih ka beisei bakah Everton hi dinhmun sang tak thlenpui theih ka tum dawn a ni,” a ti.

Kar hmasaa Everton game hmasa bera Crystal Palace nen an inkhelh tum khan Alex Iwobi hi a tel ve lo a. Inrinniah Watford nen an inkhelh hunah chuan a tel theih tawh ngei a rinawm hle.