Lisandro Martinez-a fitness a that tawk loh avangin Erik ten Hag chuan Jonny Evans a chhawr a, ni 3,125 hnuah a vawi khat nan Evans chuan United Starting XI a chang leh.

Inrinni zana si khat faia Burnley an hneh tumin kum 35 mi Evans a khel tha hle, goal awmchhung khungtu leh man of the match chu Bruno Fernandes ni mah se, Portuguese midfielder hian a lawmman dawn hi a goal khung assist-tu Jonny Evans-a hnenah a hlan chhawng.

Inkhelh zawhah Erik ten Hag chuan, "Nikum lam kha chuan kan tlarhnung a phui tha a, Premier League-a clean sheet nei hnem ber kan ni.

"Discipline tha taka kan vawn a tul a, khelh dan tur kan ruahman anga kan khelh a ngai. Chutiang anga kan khelh chuan, Manchester United hi hmachhawn harsa an ti reng ang.

"Evans khan player te chiai tur a uap tlat a, game dam deuh a khelhpui thei. A thiamna hi a ropui a, goal khung tur a siam sak dan te kha a tha thlawt a ni," tiin a sawi.

Game 3 a zawnin an chak lo, Burnley lakah erawh si khat faiin hnehna an chang. Burnley khan hun tawp lamah na takin an nawr, mahse United tlarhnung an chiai lo.

Jonny Evans hi pre-season chhung atan khan United-in contract an ziahpui a, mahse Erik ten Hag chuan season khat atan contract a ziahpui, a tisual lo niin a lang.

Northern Ireland international hlui hian an pu Erik ten Hag chunga rinna a nghah thu a sawi chhuak a, chet chhiat chang nei thin mah se, heng hi hlawhtlinna kal kawng a nih thu a sawi bawk.

"Manchester United-a kum 10 ka cham chhungin hun harsa leh hun duhawm kan tawng. Chungnung ber nih kan duh chuan, kan zinkawngah hian chetchhiat chang pawh kan nei tur a ni.

"Heng hun harsa kan tawh te hi kan inzirna zel a ni a, he club hi a ropui a, a chung bera awm tura beih duh thin club a ni. Manager hian thil tha tak a rawn pu lut ka ti lo thei lo.

"United fan ka ni a, season hmasa final match pahnih te kha ka en ve ve, manager hian theihna sang tak a nei tih a lang chiang a ni," tiin Evans chuan a sawi.

Sir Alex Ferguson-a hnuaia lo khel tawh thin Evans hian, Old Trafford-a a hun hmasa lamah khan Premier League title 3 leh Champions League title 1 a la.

Sir Alex a chhuah hnuah erawh United hian League title an la leh tawh lo. Season hmasa team buai tak kha Erik ten Hag chuan a chingfel duak a. 

FA Cup final a luhpui a, Premier League-ah pathumna nihpuiin, League Cup an chawi bawk. Tun nipui bazarah player lei khawm lehin, team khawng tak din a tum.

Mahse tun season erawh bul an tan tha lo khawp mai. Premier League-ah Tottenham, Arsenal leh Brighton te an hneh lo a, Champions League game hmasa berah Bayern Munich an hneh lo bawk.

Premier League hmahruaitu Manchester City chu United hian point 9 laiin an phak lo a, a chung lama invawrh chho leh tur chuan an beih nasat a ngai dawn a ni.