Europe lamah a kir leh dawn emaw kan lo tih mek laiin, Neymar Jr. chuan Santos tan contract thar a ziak a, he a contract thar hi kumin December thla thleng a ni.

Kum 33 mi Neymar hian kumin January thla khan Al Hilal chhuahsanin, thla 6 chhung atan Santos-ah contract a ziak. 2024-25 season chawhnu lamah Santos tan khelin, game 14 atangin goal 3 a khung a ni.

Santos hi Neymar-a chawrchhuahna club a ni a, Europe a pan hmain Santos tan game 225 a khel a, goal 136 lai a khung. "Ka rilru niloin, ka thinlungin a duh lam ka ngaithla a, thutlukna ka siam ta a ni.

"Santos hi ka team mai an ni lo, ka in a ni a, ka chawr chhuahna a ni a, hetah hian hnuhma ropui tak kan neih bakah ka nuna bet tlat a ni.

"He club-ah hian naupang ka nih lai atangin ka awm a, ka puitlinna club a ni bawk. Ka hmangaih thlawt a ni. Heta ka awm hian ka hlim em em a ni.

"Ka football zinkawngah hian kim lo a awm a, ka suangtuahna te he club-ah hian tihhlawhtlin ka duh, engmah hian min dang zo dawn lo. Ka chhuahsan a, ka lo kir leh, ka cham chhunzawm ang. Ka bultanna a ni a, ka tawpsan thei lo a nih hi," tiin Neymar chuan a contract thar ziah hlimin a sawi.