Coronavirus vangin football khelh chhunzawm theih a ni lo a, tun hnaiah Bundesliga erawh an chhunzawm leh chiah a. Europe khawmualpuia league lian zinga hma la leh hmasa ber an ni a, a dangho dinhmun hi thlir kual ila.
German Bundesliga chuan khelh hmabak game 9 an la neih chu khelh zawh ngei an tum a, league pawh an chhunzawm leh ta chiah a. An inkhelh chhunzawm leh takah hian stadium chhungah entu mipui awm theih a ni lo thung.
Europe khawmualpuia league zingah hian Bundesliga hi inkhel leh hmasa ber an ni hran lo a, kar khat kal taah khan Faroe Islands chuan league an lo chhunzawm tawh a. Belarus phei chuan league an titawp ve miah lo a, thla hnih chhung khan an inkhelhtir reng a, Europe khawmualpuiah chuan hetianga ti awm chhun hi an ni.
Estonia pawhin Thawhlehni atangin league chhunzawm an rel a, Meistriliiga chu entu mipui awm loin an khelh chhunzawm a. Czech Republic chuan May 23 atanga chhunzawm an tum a, Denmark pawhin May 28 atanga chhunzawm an tum bawk a, Serbia chuan May 30 atangin an chhunzawm ang.
Austria chuan June 2 atangin an chhunzawm ang a, Portugal chuan June 4 atanga chhunzawm an tum bawk a. Slovenia chuan June 5 atanga chhunzawm an tum a, Croatia chuan June 6 atanga chhunzawm turin ruahmanna an siam bawk a ni.
Turkey chuan June 12 atanga chhunzawm an tum a, Norway pawhin June 16 atanga chhunzawm an rel a. Russia chuan June 21 atangin chhunzawm an tum a, Finland chuan July 1 atanga league chhunzawm an tum ve bawk a ni.
England, Spain leh Italy te chuan season hman zawh ngei an la tum ve reng a, chutih rual chuan an chhunzawm hun tur hi an la sawi chiang thei chiah lo thung a. Premier League chuan thla thar laihawl vel atanga league chhunzawm theih dan an ngaihtuah mek a ni.
Italian Football Federation (FIGC) chuan Serie A leh inelna dangte chu June 14 thleng suspend a nih thu an lo puang tawh a, Italian Prime Minister Giuseppe Conte pawhin football khelh a nih leh hmain a him chiang a ni tih hriat chian viau phawt tha a tih thu a sawi bawk a ni.
Spain rmaah chuan player te’n training an nei leh tan tawh a, La Liga chu June 12 vela tan theih an inbeisei mek a. Romania pawhin May 27 vel atanga league chhunzawm theih an beisei a, Poland chuan May 29 atanga chhunzawm an beisei bawk a. Greece chuan June 6 atanga chhunzawm theih an rilruk laiin Switzerland chuan June 20 atanga chhunzawm an rilruk ve mek bawk a ni.
Netherlands chu Europe khawmualpuiah chuan season titawp hmasa ber an ni a, April 24 ah khan Eredivisie chu an titawp der tawh a. France chuan an hnung an zui vat a, April 30 ah khan season an titawp ve leh bawk a, Paris Saint-Germain chu champion atan an puang a ni.
Belgium sorkar chuan July 31 thleng infiamna chi hrang hrang tihtawp tur tih thu an chhuah hnuah anni pawhin season an titawp a, Club Brugge chu champion atan an puang a. Scotland pawhin Thawhtanniah khan Scottish Premiership an titawp a, Celtic chu an champion tir a ni.
Luxembourg leh Cyprus te chuan season an titawp ve tawh a, anni hi chuan champion an puang lo ve ve a. Cyprus-ah hian Europe khawmualpui inelnaa tel thei turin Omonia Nicosia chu an puang thung a, anni hian Champions League qualifying an khel dawn a ni.