Europe-a manager tha ber atan Pep Guardiola an thlang

24th March 2019, 02:03AM

Europe khawmualpuia infiamna chanchin ziaktu lar berte zinga mi France Football chuan Manchester City manager Pep Guardiola chu Europe bika coach tha berah an thlang.

Football huanga chawimawina sang Ballon d’Or semtu France Football hian tun hnaiah coach tha zual 50 an thlang chhuak a, hetah hian tunhma atanga coach lo ni tawh, an hun laia tha zual chu an lawr khawm a. Tuna hna chelh lai la nei mek zingah Pep Guardiola chu pakhatnaah an dah a, hmanlaia mite nen an lak khawm zingah chuan Guardiola hi pangana a ni thung.

Coach lo ni tawh hrim hrim zinga a tha zual 50 an thlan chhuahah hian Johan Cruyff chu a chungnung berah an dah a, Sir Alex Ferguson chu pahnihnaah awmin, Arrigo Sachi leh Rinus Michels te chu a dawttu an ni bawk a, an hnuai chiaha awm Pep Guardiola chu Top 5 ah hian a lang pha chiah a ni.

Catalan coach Guardiola hian a hmelma kumhlun Jose Mourinho chu a khum chiang hle a, Portuguese manager hi a pumpuiah 13-na a ni pha chauh a ni.

Guardiola leh Mourinho te hian Barcelona-ah hun an lo hmang dun tawh a, hetih lai hian Guardiola chu Barcelona captain a ni a, ‘Special One’ tia ama hming phuahtu Mourinho hi khatih laia Barca manager Louis Van Gaal assistant manager in a awm thung a ni.

Spaniard Guardiola hi manager zinga European title vawi thum dawng thei tlemte zingah a tel a. Tun season chhungin title pali la thei dinhmunah an ding mek a, EFL Cup an lak tawh bakah Premier League title la thei tur dinhmunah an ding mek a, FA Cup leh UEFA Champions League title beisei tur an la nei bawk a ni.

Premier League bikah hun eng emaw chen chu Manchester City hian Jurgen Klopp leh a pawlte, Liverpool chu an um a, tunah chuan hmahruaitu an ni ve leh tawh a. FA Cup semi final an lut tawh a, Brighton nen an inhmachhawn dawn a, City hi chak ngei tura ngaih theih an ni a, a chhe berah final chu an luh ngei hmel hle.

Manager tha zual 50 an thlan chhuahah hian tuna hna chelh lai la nei zingah Pep Guardiola chu a sang ber a, panganaah a awm a. Guardiola bakah hian Napoli manager ni mek Carlo Ancelotti chu a thleng sang ve leh deuh a, Ancelotti hi pariatnaah a awm bawk a, anni pahnih chiah hi manager ni mek zingah Top 15 a lang pha an ni.

Copyright © inkhel.com 2024. All rights reserved.