Thla hmasaa khelh UEFA Champions League round of 16 first leg game-a Atalanta leh Valencia intum chu, Italy leh Spain ram bakah Europe khawmuala coronavirus puah keh chhan a ni thei tih scientist-te chuan an sawi.

Thla hmasa ni 20 khan Atalanta chuan Champions League round of 16 inkhelah Valencia hi an lo mikhuala, Atalanta home ground Gewiss Stadium hi a tet deuh avangin Champions League bikah hian Atalanta chuan AC Milan leh Inter Milan-te stadium mi 76,000 dawn lenna San Siro an hmang hawha, he inkhel en tur hian mi 44,000 chuang chu Milan khawpuiah an fuan khawm. 

Tunah hian kan hriat tawh theuh angin coronavirus hi Europe-in an tuar ber mek tawha, Europe bikah pawh Italy leh Spain te chu a tuar ber zinga mi niin, ram pahnih belhkhawmah hian COVID-19 kai tawh mi 120,000 chuang awmin, he hri avanga thi hi belhkhawmin mi sing chuang an tling chho tawh bawk.

Khawvel pumah Italy chu a tuar nasa ber an ni mek a, Italy ram chhung bikah pawh Bergamo khawpui chu COVID-19 hluarna ber niin, he khawpui ringawtah hian mi 7000 chuangin COVID -19 hi an positive tawha, mi 1000 in thihpui tawhin, darkar chanve danah inphum reng ang an ni tih chanchinbu te chuan an tarlang hial.

Atalanta hi Bergamo khawpuia innghat club an ni a, hemi avang hian scientist te chuan Atalanta vs Valencia hi Europe-a COVID-19 ‘bomb’ tipuaktu pakhatah an ngai. Bergamo leh San Siro awmna khawpui Milan te hi 52.1kms chauha inhlat niin, an ramah chuan inkalpawhna a that avangin minute 50 vel bak kalkawngah thang a ngai lo.

Atalanta hi an club chanchina Champions League an vawikhat khelhna a nih avangin an phur em em ang tih a rintheih a, an khaw mi tan chuan an khaw thenawm lawka an team tan tura va kal kha thil chakawm tak a nih a rinawm.

Immunologist professor Francesco Le Foche sawi danin, “He hri a puah darh huk chhan hi thil hrang hrang awm thei a ni a, chung zingah chuan Atalanta-Valencia game kha pakhat a ni thei chiang. Atalanta hian football-a an la tawn ngai loh an tawn chhoh mek avangin an hlimna in a vawrtawp a thlen hun lai tak a lo ni kher kher bawk.

“Kha inkhel atang khan thla khat a liam tawha, chuvang chuan an inkhelh hun atang khan he hri ti puak tu an nih pawh hi a rinawm phah viau. Mi tam tak an pungkhawma, inhnaih tete in an awm khawma, an phur avangin an au a, an inkuah chuk chuk a, heng zawng zawng hi hri thehdarhna hmaraw tha tak a ni.

“A tam zawk kha chu an khua pawh lo sik deuh mahse ticket an neih miau avangin kha inkhel kha an en lo phal dawn lova, a nihna takah chuan mipui awma inkhelh kha a atthlak viau na in, kha tih hun lai kha chuan thil a la chiang lova, ngaihtuah thlen phak a ni lo ve bawk a ni,” a ti.

Valencia hian an squad leh staff atangin 35% laiin coronavirus an kai thu hi an puangzar tawha, Atalanta goalkeeper Marco Sportiello pawhin coronavirus hi kai tawhin an squad pumpui chu khung hran an nih phah tawh bawk. Valencia khawpuiah hian mi 2600 chuang COVID-19 an positive tawha, mi 150 bawr velin an thihpui tawh.

Atalanta leh Valencia inkhelh zawh hnuah Bergamo khawpuiah hian COVID-19 positive an pun chhoh chak em avangin he inkhel a zawh atanga ni li hnuah an khawpui hi lockdown a ni nghe nghe a, Bergamo mayor Gior Gori ngei pawhin he inkhel hi Europe-a coronavirus ti puak darh tu berah a ngaih thu a sawi tawh bawk a ni.