Europe-a assist ngah ber Hazard, Messi leh Sancho

27th April 2019, 12:04AM

Eden Hazard chu tun season chhungin Europe khawmualpuia league lian zual pangaa assist nei hnem ber a ni mek a, Lionel Messi leh Jadon Sancho te nen a chungnung ber an ni mek.

Chelsea superstar Eden Hazard hian season kal mekah mi goal thun tur vawi 13 a siamsak tawh a, Barcelona thiampuipa Lionel Messi leh Borussia Dortmund star Jadon Sancho te nen assist an neih zat hi a inang hlawm a ni.

Tottenham Hotspur ace Christian Eriksen chuan assist vawi 12 a nei tawh a, pahnihna dinhmun a hauh mek a, Eriksen ang bawk hian Bournemouth player Ryan Fraser chuan mi goal thun tur vawi 12 siamsak tawh bawk a ni.

Pathumnaah hian mi goal thun tur vawi 11 siamsak tawh Nicolas Pepe, Joshua Kimmich, Pablo Sarabia leh Julian Brandt te chu an awm a ni.

Kum 28-a upa Hazard chuan tun season chhungin goal 16 chu a thun tawh a, goal khat a thun belh leh a nih chuan season khat chhunga Premier League goal a thun hnem ber tum a ni thei dawn a. Season tluana goal a thun hnem ber record chu goal 16 a ni a, khum theihna hun tha a la nei a, season tawp hmain game thum khelh tur a la nei a ni.

Hazard hian Chelsea tana season a hman that ber tum a tawng mek a, PFA Team of the Year-a an thlan tel loh avangin mak tih pawh a hlawh hle a. Tlar hma lamah Sergio Aguero, Sadio Mane leh Raheem Sterling te chu an thlang a, mi tam tak chuan Hazard tel lo chu pawm harsa an ti hle.

Real Madrid chuan Hazard hi an beisei tawp thei lo a, season tawp hunah Bernabeu lama thlem luh an la tum reng a. Stamford Bridge lamah Hazard hian kum khat chhung atan contract a la nei mek a, Los Blancos chuan Madrid khawpuiah kar khata £400,000 hlawhtir an inhuam a ni.

Kum 19-a upa Jadon Sancho pawh Bundesliga lamah a che tha thei hle a, Manchester United chuan man to deuh hlek pawha lei an duh hial a. Gareth Southgate chuan England aiawha khel tur pawhin a koh phah hial a ni.

Copyright © inkhel.com 2024. All rights reserved.