​Europa League results: Arsenal an tlawm laiin Chelsea an chak

15th February 2019, 02:02PM

Europa League knock-out stage first-leg inkhelah London club pahnih an inlana, Arsenal hi khual mualah an chak loh laiin, Chelsea hi khual mualah an chak thung.

Arsenal hian Belarusian club FC BATE Borisov chu Borisov Arena-ah an luhkhunga, North London club hi si khat faiin an tlawma, striker Alexandre Lacazette chu 85mins-ah hnawhchhuah a ni bawk. Goal lut awmchhun hi Stanislaw Drahun-a thun a niin, second leg-ah Arsenal hi an chan a chhe zawk dawn a, Emirates Stadium-ah BATE hi an lo mikhual ve thung ang.

Chelsea hian Swedish club Malmo chu Swedbank Stadion-ah an luhkhunga, khual mualah West London club hi 2-1 in an chaka, second leg-ah chan tha zawk an chang dawn. Chelsea hian Ross Barkley leh Olivier Giroud-a te goal hmangin an chaka, hun tawp hnaih lamah Malmo hian an si phurh pakhat an rul a, Anders Christiansen chuan 80mins-ah goal a khung.

Inkhel dangah Lazio chuan Sevilla an lo mikhuala, Sevilla hi Wissam Ben Yedder-a goal awmchhun hmangin si khat faiin an chak. Rapid Wien chuan Serie A club Inter Milan lo mikhualin, Inter hi khual mualah si khat faiin an chak ve bawka, goal awmchhun hi Lautaro Martinez-a’n penalty spot atanga a khung a ni. Galatasaray chuan Benfica an lo mikhuala, Benfica hi 2-1 –a chakin Eduardo Salvio leh Haris Seferovic-te goal hmangin Benfica hi an chak. Napoli chuan FC Zurich lakah 3-1 in hnehna an chang bawka, Napoli tana goal khungtute hi Lorenzo Insigne, Jose Callejon leh Piotr Zielinski-te an ni.

Copyright © inkhel.com 2024. All rights reserved.