Europa-a Club inelna lian ber chu UEFA Champions League a ni, Europe ram hrang hranga league-a titha ten an khel thin. Chumi hnuai chiah chu Europa League a ni a, Champions League khel phak lo team ten chu chu an khel ta thin a ni.
Season tharah hian England atangin club pali ten Europa League an khel thei dawn a. Table-a 5-na leh 6-na ten an khel anga. FA Cup champion chuan Europa League a khel thei dawn bawk. Hetih lai hian FA Cup champion chu Champions league khel thei a nih chuan table-a 7-na chuan Europa League a khel thei ang. Tin, season tharah Fair Play team in Europa League an khel thei dawn bawk a, West Ham hian Europa League an khelh hmel ta hle a ni.
Liverpool, Tottenham leh Southampton te hian spot hnih awm an inchuh dawn a. FA Cup final-ah hian Arsenal chu champion selang chuan heng club pathumte hian Europa League an khel thei dawn. FA Cup runner up team tan Europa League khelh theihna chance hawn a ni tawh lo. Chutih laiin May ni 30-ah hian enge thleng dawn a hriat lo. FA Cup champion lai Arsenal hian Aston Villa hi Wembley Stadium-ah hneh ta lo selang table-a 5-na leh 6-na ten Europa League an khel dawn. 7-na tan chance a awm dawn lo a ni.
Liverpool hian an tum ber chu Champions League khelh a ni a, mahse an tlin ta lo. Table-ah 5-na ni mahse Premier League tawp niah hian Stoke an hneh lo a nih chuan 7-naah an tla thla vang vang thei tlat mai. Tottenham-in Everton an hmachhawn dawn a, Southampton in Manchester City an hmachhawn dawn bawk a. Hemite pathum zingah hian Europa League khel tur chiang an la awm tlat lo mai.
Liverpool leh Tottenham te hi chuan Champions League thlengin tawnhriat an lo nei tawh, chuvang chuan Europa League khelh hi thil thar a ni dawn lo. Southampton hian khel thei ngat selang chuan an tan thil thar leh ropui tak a ni dawn. An player naupangte tan Europe-ah tawnhriat neihna hun remchang a ni chho dawn a. Tin, Club naran ve mai kha tunah chuan Europe inelna sangah an tel a nih chuan an sum lakluh pawh a tam sawt dawn bawk. Chutiang bawkin West Ham club tan pawh thil ropui tak a ni dawn chiang mai le.
Southampton hian Europa League khel se an che tha angem ? Tih chu zawhna lian tak a ni a. Club tha tak tak Europa League-ah an inlan dawn, chutih laiin Fulham te pawhin Final an luh theih chuan Southampton tan chuan theih tawpa beih chuan result tha tak an nei thei dawn tlat mai. Chutiang bawkin West Ham pawhin Europe-ah hnuhma tha tak an hnutchhiah thei dawn a ni.