Lockdown hmaa Europa League round of 16 khelh zawh hman loh te chu khelh chhunzawm mek a ni a, Manchester United chuan an mikhual LASK chu 2-1 in Old Trafford-ah an lo hneha, aggregate-ah 7-1 laiin United hi an chaka, chiang takin quarter final an lut.
United hi first leg-ah 5-0 in LASK home-ah an chak tawha, ngaih tha takin second leg an khel. LASK hian second half-a minute sawm khelh a nihin Philipp Wiesinger-a goal hmangin hma an hruaia, Jessie Lingard chuan minute hnih hnuah United si phurh a sut leh nghal. Hun tawp dawnah Anthony Martial chuan United tan goal khung lehin, United hian hnehna an chang ta a ni.
Manchester United 2-1 LASK (agg 7-1)
(Lingard 57’, Martial 88’) (Wiesinger 55’)
Inter Milan chuan 2-0 in Getafe an hneha, quarter final an lut ve bawk a, lockdown hmaa first leg khelh hman a nih ve loh avangin he inkhel hi vawi khat chiah khelh a ni dawn a, Germany-a Veltins-Arena ah khelh a ni.
He inkhelah hian Manchester United striker hlui Romelu Lukaku leh Tottenham midfielder hlui Chirstian Eriksen te chuan Inter tan goal khat ve ve an khunga, Antonio Conte leh a naute’n hahdan takin quarter final an lut.
Inter Milan 2-0 Getafe
(Lukaku 33’, Eriksen 83’)
Inkhel dangah Shakhtar Donetsk chuan Wolfsburg an lo mikhuala, first leg-ah Shakhtar hi Wolfsburg home-ah 2-1 in an lo chak tawha, second leg ah hian Shakhtar hian si thum faiin hnehna chang lehin, aggregate-ah 5-1 in quarter final an lut.
Mual neitu lam Shakhtar tan hian Junior Moraes chuan goal hnih a khung bakah Manor Solomon chuan goal khat a khung bawka, goal thumte hi 89mins hnua lut vek an ni. Shakhtar player David Khocholava leh Wolfsburg player John Brooks te chu he inkhelah hian hnawhchhuah an ni ve ve.
Shakhtar Donetsk 3-0 Wolfsburg (agg 5-1)
(Moraes 89’, 90+3’, Solomon 90+1’)
Turkish club Istanbul Basaksehir chuan first leg-a si khat faia an lo hneh tawh Copenhagen an tlawh ve thunga, mahse Copenhagen hian si thum faia lo hnehin, Danish club Copenhagen hian quarter final an lut.
Copenhagen tan hian Jones Wind chuan goal hnih a khunga, Rasmus Falk chuan goal khat a khung bawka, Wind-a goal hnihna hi penalty spot atang khung a ni.
Copenhagen 3-0 Istanbul Besasehir (agg 3-1)
(Wind 4’, 53’pen, Falk 61’)