​Europa League Champions Sevilla

28th May 2015, 02:05PM

Nizan khan Europa League final khelh a ni a, Sevilla chuan Ukraine club Dnipro Dnipropetrovsk 3-2 a hnehin an champion ta a, Sevilla hi a zawnin vawi hnih an champion ta a ni. Sevilla tan Colombian forard Bacca chuan goal hnih a khung nghe nghe.

Warsaw final hi a hmuhnawm khawp mai a, Sevilla hian vawi 4 lai Europa League title an la ta. First half-ah goal 4 ngawt a lut a. Dnipro Dnipropetrovsk tan Kalinic chuan tan atanga minute 7-na lekah Matheus cross tha zet chu a tauh goal.

He goal hi 28th mins-ah Grzegorz Krychowiak chuan set piece atangin a rul a. Carlos Bacca corner pet tha zet chu box chhung a thlenin a buai deuh nuai nuai, hemi karah hian Krychowiak chuan a pet goal ta khauh a, 1-1 a ni ta.

Rei an khel hman lo, Sevilla chuan goal hnihna Bacca hmangin 31st mins-ah an khung chhunzawm lehnghal a. Arsenal player hlui Reyes throughball tha zet chu Bacca hian umin, goalkeeper a bum hnuah cool takin a pet goal ta a, 2-1 in Sevilla chuan hma an hruai ta.

Dnipro an la beidawng lo, first half tawp dawn minute khat lek la awm tihin Matheus chuan 25 yards-ah free kick a hlawh chhuak. He free kick hi Ruslan Rotan chuan mawi em emin Dnipro tan a pet goal a, half time a nih chuan 2-2 in an inhnehtawk.

Second half inkhel hmuhnawm takah Sevilla chuan Bacca hmangin goal an nei leh ta a, 73rd mins-ah Vitolo through ball tha zet chu Bacca chuan goal khung nan a hmang chhunzawm leh a, he goal hi Sevilla chuan an champion pui ta a, 3-2 in Sevilla chuan hnehna an chang ta a ni.

Europa League champion te hian season tharah Champions League an khel thei tawh dawn a, Sevilla hian La Liga atangin Champions League khelh theihna an hlawh chhuak zo lo, mahse Europa league atangin an hlawh chhuak ta a ni.

Champion coach Emery chuan,"Kan thawkrim em em. A tu apawh kan che tha. Harsatna lian tak tak game-ah khan kan hmachhawn. Half time khan he tournament pawimawh zia kan inhrilh nawn leh a, he hun hi kan tawng ta, kan phu a ni," tiin a sawi. La Liga atangin Champions League khel tur club panga an awm ta a, Sevilla hian Group stage atangin an khel tan dawn ta a ni.

Copyright © inkhel.com 2024. All rights reserved.