Europa League inkhelah Premier League club lian pahnih Arsenal leh Chelsea-te inlanin an tumpuite ve ve lakah nuamsa takin hnehna an chang.

Group E inkhelah Arsenal chu Ukranian club Vorskla chuan NSC Olimpiyskiy-ah an lo mikhuala, khual mualah Arsenal hi si thum faiin an chak.

Arsenal line-up hi an naupang tlang hle a, Rob Holding, Maitland-Niles, Matteo Guendouzi,Emile Smith Rowe, Joe Willock leh Nketiah-te chuan inkhel bul an tan vek. Arsenal tan hian inkhel bul atanga minute sawmah Smith Rowe chuan goal hmasa ber a khung a, Aaron Ramsey chuan 27mins-ah penalty spot atangin a khung bakah half time hma lawkin Willock chuan Gunners goal thumna a khung ve leh.

Group E-ah Arsenal chu hmahruaitu niin khelh ngaah point 13 hlawhchhuak tawhin, Sporting Lisbon-in an dawta, Sporting hian khelh ngaah point sawm an hlawhchhuak ve tawh thung. Vorskla chuan point thum hmu tawhin pathumnaah an awm a, Qarabag FK chu a mawng berah awmin, anni pawh hian point thum an hlawhchhuak tawh ve bawk.

Group L inkhelah Chelsea chuan Stamford Bridge-ah Greek club PAOK lo mikhualin, Chelsea hian an lo dim lo hle a, 4-0 in an mikhual hi an sawp.

Blues manager Maurizio Sarri chuan Europa League-a a tih dan pangaiin line-up a siksawi nasa leh hle a, goalkeeper manto Kepa Arrizabalaga leh Ross Barkley-te  tih loh chu inkhel khat tak deuh vek an ni. Chelsea tan French striker Olivier Giroud chuan goal hnih a khunga, rawlthar duhawm tak Callum Hudson-Odoi leh striker Alvaro Morata-te chuan goal khat ve ve an khung bawk. Inkhel bul tan tir 7mins-ah PAOK player Yevhen Khacheridi chu hnawhchhuah a ni.

Chelsea hian Europa League-ah point hloh an la nei lova, khelh nga atangin point 15 hlawhchhuak tawhin group L hmahruaitu an ni chiang hle a, BATE chuan dawtin, anni hian khelh ngaah point ruk an hlawhchhuak tawh a, pathumnaa awm Vidi pawhin point ruk tho an hmu tawh. PAOK chu group mawngphahah awmin khelh ngaah point thum bak an la hlawhchhuak lo a ni.