Manchester United tana penalty pet tu Bruno Fernandes chuan Europa League-ah an champion thei a nih chuan Premier League title leh title dang tan kawng a inhawn theih thu a sawi.

Manchester United hian Europa League semi final an lut tawha, Sevilla nen an inhmachhawn dawn. United hi champion tura rinkai ber zinga mi an ni a, Ole Gunnar Solskjaer-a tan United manager anga a trophy hmasa ber chawina hun tha a inhawng mek.

Tun season-ah United hian competition an khelh zawng zawngah semi final an la lut veka, Carabao Cup leh FA Cup-ah te erawh final an lut zo lova, Europa League lamah final luh tawh ngei an tum hle.

Fernandes chuan, “Hma kan sawn zela, tha taka season thar kan tan a ngaia, chak duhna thinlung pu a season bul kan tan a ngai hle. Club lian tak leh tum nei sang tak tan kan khel tih kan hria a, player te pawh kan tum a sanga, trophy chawi kan duh.

“Premier League hi kan trophy chawi duh zinga pakhat chu a ni ngeia, Europa League-a champion hian trophy dang lak theihna atan kan rilru lamah nghawng a neih ngei pawh ka beisei a, club lian ber ber te elpha tura kawng khat niin ka hria. Kan champion thei a nih chuan season thar atan kan tan a pawimawh dawn hle in ka hria,” a ti.