Euro 2020 quarter-finals khelh zawh fel a ni ta a, quarter-final inkhel hnuhung berah England leh Ukraine te chu Italy khawpui Rome-a Stadio Olimpico-ah inhmachhawnin, England hian 4-0 ngawtin hnehna an changa, semi-final an lut chiang hle.

England tan hian an captain Harry Kane chuan goal hnih a khung bakah Manchester United captain Harry Maguire leh Liverpool captain Jordan Henderson-te chuan goal khat ve ve an khung bawka, nuamsa takin England an chaka, kum 25 hnua a vawi khat nan Euro-ah semi-final an khel dawn.

England hian tun Euro kal mekah goal an la chhuah lova, Euro chanchinah England hi an game hmasa panga a goal chhuah miah lo thei awm chhun an ni mek. England hian a zawnin clean-sheet 7 an nei meka, hetiang hi England football chanchinah a la thleng ngai lova, minute 662 chhung zet goal an chhuah tawh lo a ni.

England hian Round of 16-ah si hnih faia Germany hnehin quarter-final hi an luta, Ukraine lakah chak tura rinkai zawk pawh an ni renga, rin ang ngeiin hnehna an chang ta a, semi-final Czech Republic hneha semi-final lut Denmark nen Wembley Stadium-ah an inhmachhawn ang.

Inkhelh tan atanga minute li vel awrh khelh a nihin England hian hma an hruai nghala, Manchester City winger Raheem Sterling chuan veilamah ball khalhin, a cut luta, Ukraine box pawn lawk atangin box chhunga awm Kane a pe, Kane hian goal-ah a lo khung zuia, 1-0 a ni.

England hi chungnung zawk an ni a, first half-ah erawh team hnihte hi inkhan lo lutuk an ni lova, statistics lamah pawh an inthlau lem lo. Darkar chanve chuang hret khelh a nihin West Ham midfielder Declan Rice chuan chance tha a neia, mahse box pawn atanga goal-a ball a pet chu Ukraine goalkeeper Bushchan chuan a lo save.

First half-ah chance awm ve leh thin mahse chance tha tia sawi tur a tam lova, inkhel hmuhnawm tak tia sawi tur team hnihte atangin a awm lem lo bawk. 1-0 in first half a tawpa, second half a tan chiah tihin England hian goal an khung belh leh nghal; Kane chuan mual veilamah freekick a hlawhchhuaka, freekick atang hian Luke Shaw chuan Ukraine box chhungah ball vawrh lutin, hei hi Maguire chuan chiang takin goal-ah a lo tauh luta, 2-0 in England hma a hruaipui.

England game hi first half-ah dul leh viau mahse second half-ah erawh an khel a nung angreng viaua, an coach Gareth Southgate chuan Jadon Sancho chu inkhel bul tan tirin Sancho hi a khel chhe lo hle a, inkhel zinga take-ons (3) ngah ber a ni nghe nghe a ni.

Maguire-a'n freekick atanga ball vawrh luh a tauh goal hnu lawkah England-in goal dang an khung leh nghala, Mason Mount chuan Ukraine goal lamah ball a khalh phei, a veilama awm Shaw a pe a, Shaw hian goal hmazawnah ball cross pheiin, Tottenham striker Kane chuan lo tauh luta, 3-0 in England hian hahdamthlak takin hma an hruai. Kane hian international tournament lianah goal kua a khung tling ta a, Alan Shearer nen inang chiahin, goal 10 khungtu Gary Lineker chiah England tana tournament liana goal khung hnem lamah tluk loh a nei. 

Darkar khat chuang hret an khelhin Kane-a shot tha tak chu Ukraine keeper chuan a lo save pera, England hian corner an hlawhchhuak zui bawk. Chelsea midfielder Mount chuan corner atang hian box-ah ball a vawrh luta, hei hi bench atanga lut Henderson chuan goal-ah a lo tauh lut ve leh a, 4-0 laiin England hian hma an hruaia, Henderson hian England tan a goal hmasa ber a khung.

Ukraine lam an bet angrenga, chance tha pawh an ngah lo, 73mins velah erawh Ukraine lamin chance an insiam tha hle a, bench atanga lut Yevhenii Makarenko-a shot tha tak chuan England si ban nghaktu Jordan Pickford chuan a lo hnek per sak. England hian hnehna an chang dawn chiang tih an inhriat hnuah player an inthlak nuala, an player thenkhat hahchawlh tir pahin, player thenkhat inkhelhna hmun chang tam lo te an luh tir ve bawk. A tawp thlengin goal a luh belh tawh lova, 4-0 hian inkhel a tawp ta a ni.

Ukraine 0-4 England

(Kane 4’, 50’, Maguire 46’, Henderson 63’)

Player Ratings