Italy chuan Euro 2020 khelh mekah Austria chu Round of 16 inkhelah 2-1 in an hneha, Azzurri hian Quarter Final lutin, Quarter Final-ah FIFA ranking-a pakhatna Belgium emaw, Euro champion lai Portugal an hmachhawn dawn a ni.
Italy leh Austria te hi UK-a stadium lian ber Wembley Stadium-ah an inhmachhawna, 90mins chhunga goal khung thei an awm loh hnuah, Extra Time khelh niin, ET-ah hian goal thum a lut. Italy tan hian bench atanga dah luh pahnih Federico Chiesa leh Matteo Pessina te chuan goal an khunga, Austria tan hian Stuttgart forward Sasa Kalajdzic chuan goal a khung ve bawk.
Italy hi heti hian a zawnin game 31 hneh loh nei lovin an kaltluang tawha, Italy national team hi heti anga rei hi hneh loh nei lovin an la awm ngai lo. Italy hian nikum October thla hnuah a vawi khat nan goal an chhuaha, a zawna game 11 goal chhuah lova an awm tawh chu tihtawp a ni.
Inkhel a hmuhnawm hle a, team hnihte innawr tawn zak zakin, team chhe zawka ngaih Austria an khel tha hle a, an vanneih zan nise Quarter Final luh zawkna chance pawh an nei sang hle a tih theih hial awm e.
Italy hi chungnung zawk viau tura ngaih an nih laiin, Austria nen an intum tawk hle a, kawng engkimah an inthlau lo tih theih a ni. Austria lam an taima a, an khel tha a, a vanduai zawk niin, ET khelh a nih hnuah squad pan zawk an nih a hriat chho viaua, an tlawm chhan ber pakhat ni te pawhin a lang.
Italy lam hian a tir 15mins vel khelh a nihin chance tha tak an nei a, mahse Nicolo Barella-a shot tha tak chu Austria goalkeeper Bachmann chuan a lo save sak. Goal lehlam lehlama chance kan hmu tawn renga, mahse goal hma takah team pahnih te hi an hriam tawk lo. Italy striker Ciro Immobile chuan half time hma deuh lawkin Azzurri lam hi hma a hruai pui teuh viaua, yard 30 vel laia hla atanga goal-ah ball a shoot chuan si ban a per dawta, a goal mawi teuh hle.
Second half lamah Austria an khel tha zuala, hlauhawm pawh an hlauhawm thin hle. 65mins velah Austria hian goal an khung emaw an ti a, Chinese club Shanghai Port forward Marko Arnautovic chuan goal khung zet mahse a offside vel chiah chiah avangin VAR lamin kum 32 mi goal hi a sut leh.
Arnautovic-a goal sut leh a nih hnu lawk hian Italy head coach Roberto Mancini chuan a rualin player pahnih a thlak, Barella leh Marco Verratti te la chhuakin, Pessina leh Manuel Locatelli-te a dah lut. Austria hi second half-ah an hlauhawm zawk maha, an taimak em vangin an indaihzai a, Italy lam duh angin an che thei hauh lo. Mancini hian 80mins chuang khelh a nihin player pahnih a thlak leha, Immobile leh Domenico Berardi-te la chhuakin, Andrea Belotti leh Chiesa te a dah lut.
0-0 in 90mins a tawpa, chak zawk zawng turin Extra Time khelh a ni. ET-ah minute nga vel awrh an khel tihin Italy hian hma an hruai ta a, box chhung dinglama awm Chiesa chu a kanga ball pek niin, Chiesa hian leiah ball tauh thla a, ball chhuhsak a nih hmain a pet sawt leh hmana, a ke veilamin angle tight tak atangin goal-ah ball a pet luta, 1-0 a ni.
Austria lam hian goal an chhuah hnu lawkah player thlakin, Marko Arnautovic aiah Kalajdzic dah luh a ni. Austria hian goal khung tum hle mahse ET half time a nih hma chiahin goal an chhuah belha, Italy goal hnihna khungtu hi Atalanta midfielder Pessina niin, ani hi Mancini-a’n Euro 2020 khel tur Italy squad player 26 zinga tel pawh a ni lo. Pessina hi koh tel ni lo mahse Stefano Sensi a inhliam avangin koh a ni hnuhnawh leha, group stage lamah pawh Wales lakah goal pawimawh tak a khung tawh bawk a ni.
2-0 in ET half time an hmanga, Et second half an khel tan tihah Austria hian goal an khung nghal teuh hle, Schaub-a shot tha zet chu Italy goal keeper Gianluigi Donnarumma chuan a ai tha in a lo save. Austria lam hian player thlak kualin goal khung tum hle mahse an thei lawk lo. Mahse, 114mins-ah goal an khung ve ta a, corner atanga ball vawrh luh chu bench atanga dah luh Kalajdzic chuan near post lam atangin mawi takin goal-ah a lo tauh luta, 2-1 a ni.
ET tawp hma lawkin Italy lamin chance tha an nei leha, Chiesa chuan Austria goalkeeper Bachmann chu ball a chip khum hnuah ball a um leha, mahse Trimmel chuan ball chang hmasa in a pet hmana, Austria goal chhuah tur a chhan him. 2-1 hian inkhel a tawpa, Austria khel tha hle mahse team nem zawk nge nge chu a rei hnuah a langa, an zinkawng tawpin, Italy erawh an tlang ta a ni.
Italy 2-1 Austria [AET]
(Chiesa 95’, Pessina 105’) (Kalajdzic 114’)
Shots: 26-15
Shots on target: 6-3
Touches in the opposition box: 42-24
Possession: 51%-49%
Pass accuracy: 87%-81%
Duels won: 76-78
Player Ratings
